Protesta e Studentëve/ Mbyllet me “Pakt”, Kryeministrit: Kthehemi sërish nesër!

Për rreth katër orë ka zgjatur Protesta e Studentëve para Kryeministrisë së cilës iu bashkuan sot edhe minatorët, naftëtarët, banorët e Unazës së Re dhe qytetarë të Tiranës.

Sot studentët kanë shtuar edhe kërkesën e tyre të nëntë, anulimin e Ligjit për Arsim të Lartë, kërkesë kjo që ishte parashtruar kohë më parë edhe nga pedagogët.

Studentët duke mbyllur protestën i bënë me dije Kryeministrit Edi Rama se ajo do të vazhdoj nesër në të njëjtën orë me të njëjtën agjendë.

Ndërkohë studentët kishin përgatitur për sot edhe një Pakt për Universitetin në përgjigje të Paktit që kishte miratuar Edi Rama me qeverinë e tij.

Atë që dallon Paktii Universiteteve që është hartuar nga vetë studentët me atë të Edi Ramës është fakti se ky Pakt i kushtohet studentëve dhe shqetësimet që kanë dhe jo propagandës qeveritare për të dëshmuar se tek godina ku ata protestojnë dikush edhe punon.  

Ky Pakt i është nisur Kuvendit, kryeministrit Rama, Ministrisë së Arsimit dhe Universiteteve publike.