Maqedonia e Veriut/ Thaçi dhe Haradinaj përshëndesin ndryshimet kushtetuese…

Presidenti dhe Kryeministri i Kosovës duke përshëndetur votimin e ndryshimeve kushtetuese nga Parlamenti i Maqedonisë për ndryshimin e emrit, theksojnë se një veprim i tillë e dërgon rajonin drejt paqes së përhershme.

Presidenti i Kosovës, Hashim Thaçi, tha se Parlamenti i Maqedonisë dëshmoi guxim, vizion dhe vetëdije të lartë, duke votuar për ndryshimet kushtetuese të parapara me Marrëveshjen e Prespës, që shënojnë hapin final drejt ndryshimit të emrit të vendit. Vendimi i tyre nuk ka qenë fare i lehtë, as popullor, por ishte vendim i duhur, i cili tejkalon interesat partiake për shtetin dhe qytetarët.

“Republika e Maqedonisë apo Maqedonia Veriore, siç do të quhet tash, bëri një hap të madh përpara, duke i hapur perspektivë stabilitetit politik, vazhdimit të reformave dhe integrimit të vendit në institucionet veriatlantike, për t’iu garantuar jetë më të mirë qytetarëve dhe brezave të rinj,” thekson Presidenti i Kosovës përmes rrjetit social Facebook.

Ndërsa Kryeministri i Kosovës, Ramush Haradinaj, duke përshëndetur ndryshimet kushtetuese për emrin e Maqedonisë tha se një veprim i tillë e dërgon rajonin drejt paqes së përhershme.

“Përshëndes votimin e ndryshimeve kushtetuese në Kuvendin e Maqedonisë, për ndërrimin e emrit të vendit në Republika e Maqedonisë Veriore, si hap madhor në rrugën e integrimeve euro-atlantike të shtetit fqinj. Kjo ngjarje me peshë në historinë e re të Ballkanit Perëndimor është shpresë që rajoni ynë po shkon drejtë paqës së përhershme,” thekson Ramsuh Haradinaj permes rrjetit social Facebook duke përgëzuar homologun Zoran Zaev për vizionin e dëshmuar properëndimor dhe shqiptarët në Maqedoni për rolin kyç në këto ndryshime.