Protesta e Studentëve/ Ngujimi vazhdon, përbaltësve: Në djall shkofshi…

Rreth 50 studentë të ngujuar brenda Fakultetit Ekonomik sot bënë edhe një deklaratë për mediat duke ju bërë me dije atyre që sulmojnë se protesta e studentëve vazhdon ndërsa për ata që vazhdojnë e përbaltin kërkesat e tyre, kishin një mesazh të qartë:

“Nëse mendoni se jemi partiakë, në djall shkofshi dhe ju me to!”

Dhe jo vetëm kaq! Të indinjuar me trajtimin që ju bëhet si në arsim ashtu edhe si protestues, studentët përmes deklaratës shprehen se nuk duan asgjë më shumë se Arsim:

“Gjithmonë kemi besuar për lirinë e mendimit dhe një të ardhme më të mirë. Jemi bërë popull pa shtyllë kurrizore në mendim, me mungesë ndërgjegje në llumin e të pamoralshmes.

Pas një muaji, janari duhet të na gjente më me dinjitet ambientet tona nuk janë në gjendje funksionale, janë ende të ftohta. E vetmja gjë që kemi është infrastruktura e mendimit idealist.

Qëllimi ynë nuk ishte rrëzimi i partive, as i qeverive. Kemi dëgjuar lloj-lloj sulmesh. Ne ju themi: Në shkollë kemi prezencën idealiste të shumicës. Ju lutem, mjaft na përbaltët sepse dielli i shpresës do të shkëlqejë. Të gjithë duam arsim. Nëse shihni atë që ne shohim, nëse ndieni atë që ne ndiejmë, le të qëndrojmë të bashkuar!”

Ndërkohë për vijimësinë e protestës, studentë e bënë të qartë se do bëjnë një mbledhje në orën 18:00 ku do të vendoset se si do të veprohet në vazhdim.