Reshje bore/ Veriu me reshje të dendura, ARRSH: Ja ku janë të domosdoshëm zinxhirët…

Ashtu siç kishin parashikuar meteorologët, reshjet e borës filluan gjatë natës në Veri të vendit dhe në Korçë.

Në gjithë territorin e Dibrës dhe Bulqizës kanë rinisur reshjet e dendura të borës, rrugët nacionale nuk paraqiten ende probleme, ndërsa në zona të thella janë shfaqur sërish probleme me ujë dhe drita. Në fshatrat e Lurës dhe të Reçit, ku dhe po punohet aktualisht për riparimin e defekteve, ndërsa në Kalanë e Dodës është rikthyer energjia. Trashësia e borës kalon 20 cm ndërsa temperaturat kanë arritur deri në -5 gradë Celcius.

Në qytetin e Peshkopisë furnizimi me ujë vazhdon të jetë 30 minuta në 24 orë ndërsa pjesa më e madhe e zonës nuk ka fare ujë për shkak të ngricës.

Probleme ka patur edhe në Bulqizë në aksin nacional nga Pishat deri te Qafa e Buallit. Në rrugët e brendshme të qytetit të Bulqizës dhe në atë të spitalit ka patur ngrica gjithashtu. Mungesë energjie elektrike kanë edhe njësitë Ostren, Trebisht, Martanesh dhe disa fshatra në Tërnovë

Meteorologët parashikojnë parashikojnë përmirësim të motit në mesditën e sotme në të gjithë vendin por sërish reshjet do të rikthehen në mbrëmje, të cilat do shtrihen në të gjithë Shqipërinë.

Njoftim i ARRSH

Në Rajonin Verior Shkodër: 
Në lartësi ka pasur reshje bore, kontraktorët kanë vazhduar punën për pastrimin e akseve dhe shpërndarjen e kripës.

Qarkullohet me zinxhir në:
Zalldardhë – Draj Reç
Domaj – Draj Reç
Ura e Cerenecit – Steblevë, 20 km e fundit të aksit.
Reç – Qafë Drajë

Në Rajonin Qendror Tiranë: 
Në rrugën Librazhd-Steblevë ka pasur reshje bore rreth 10 cm, të cilat janë pastruar nga kontraktori. Të gjitha akset e këtij Rajoni qarkullohen pa probleme.

Në Qarkun e Gjirokastrës dhe Vlorës: 
Gjatë natës ka pasur reshje shiu. Nuk paraqiten probleme ne qarkullimin e mjeteve.Në Qarkun Korçë:
Gjatë natës ka pasur reshje të dobëta bore, kontraktorët kanë punuar gjatë natës për pastrimin e akseve dhe shpërndarjen e kripës, qarkullimi kryhet normalisht pa zinxhir në të gjitha akset.
Qarkullohet me zinxhirë vetëm rruga K/Boboshticë-Dardhë, në pjesën fundore.