Bie orteku i borës, humb jetën Zv/ministri

Policia e Kosovës ka konfirmuar se sot në Brezovicë, nga rënia e një orteku të borës, ka mbetur i vdekur
Zv/ministri i Diasporës, Arian Daci. Ndërkohë sipas Nënkolonel Basri Shabanit, personi tjetër të cilin e zuri orteku, Ardian Bakalli, është në gjendje të mirë.

“Konfirmojmë që nga orteku ka ndodh sot, A. D ka humbur jetën. Personi tjetër është në gjendje të mirë. Një ortek i borës e ka zënë personin, viktimën A.D dhe ka ardh deri te humbja jetës,” tha Nënkolonel Shabani.

Mënjëherë drejtë Brezovisë janë nisur edhe Hetuesit rajonal, ndërsa kufoma e të ndjerit është transferuar pranë një hoteli.

“Hetuesit rajonal janë nisë për në Brezovicë, sipas komandantit të policisë së Shtërpcës kufomën e kanë ofru deri te hotel “Molika”, dyshohet se viktimën e ka zënë orteku i borës. Kaq dihet deri më tani,” tha kryeprokurori i Prokurorisë Themelore të Ferizajt, Shukri Jashari.

Për vdekjen e Zv/ministrit të Diasporës, Arianit Daci, ndryshe djali i kryetarit të Akademisë së Shkencave të Kosovës, Nexhat Daci, kanë reaguar figura të shumta publike.

Kryeministri i Kosovës, Ramush Haradinaj, duke ngushëlluar Akademik Nexhat Dacin për vdekjen e djalit të tij, thekson: “I tronditur nga fatkeqësia në Brezovicë, ku humbi jetën Arian Daci, zëvendësministër i diasporës, kurse mbeti i lëndur Ardian Bakalli. Ngushëllimet më të sinqerta mikut tim, Akademik Nexhat Dacit, familjes së ngushtë të Arianit si dhe miqve e kolegëve të tij.”