Pazaret e Thaçit/ Albin Kurti: Nuk pranojmë Marrëveshje që prek territorin Kosovës

Kryetari i Lëvizjes Vetëvendosje, Albin Kurti në mbledhjen e XXXVI-të Këshillit të Përgjithshëm, i ka bërë të qartë Presidentit të Kosovës, Hashim Thaçi se nuk do të pranohet asnjë Marrëveshje që prek territorin e Kosovës.

“Presidenti Thaçi me njerëzit e tij po këmbëngulin në pazaret me territor, le ta dinë se nëse përpiqen të na vendosin para aktit të kryer me ndonjë marrëveshje që prek territorin e Kosovës, protesta jo vetëm që do të përsëritet por do të jetë edhe më e madhe,” tha Kryetari I Lëvizjes Vetëvendosje  ndërsa ka kritikuar qeverisjen e Ramush Haradinajt e cila ka përkeqësuar gjendjen ekonomike dhe sociale, ku theksoi dhe grevën e mësimdhënësve dhe privatizimin e Telekomit.

“Ka qenë pikërisht mendësia dhe ideologjia e privatizimit që i solli këto probleme kur pjesë të mëdha të territorit dhe popullsisë mbetën pa rrymë sepse kompania private që duhet të investojë në rrjetin e shpërndarjes nuk e bën këtë, por vetëm vjel të ardhura e fitime që i dërgon jashtë vendit.”

Albin Kurti foli edhe për Fondin e Kursimeve Pensionale të Kosovës, i cili vetëm vitin e kaluar, për shkak të keqqeverisjes humbi 85 milionë euro.

“Për shkak të keqinvestimit i kemi humbur paratë me të cilat do të mund të ishin dyfishuar pagat e mësuesve dhe mjekëve. Pse ndodh kjo? Sigurisht për shkak të keqqeverisjes dhe drejtimit të gabuar politik,” tha Kurti duke u zotuar me ardhjen së në pushtet, mësuesit, mjekët e punëtorët e administratave publike do të kenë paga meritore.

Me këtë rast ai akuzoi partitë në pushtet se po e vjedhin edhe Telekomin e Kosovës: “Tash ata po përpiqen ta privatizojnë Telekomin e Kosovës, një ndërmarrje e cila vazhdimisht del me fitim po të mos ishte duke u vjedhur prej partive në pushtet e kontratave të dëmshme sikurse ajo me Zmobile” tha Albin Kurti, duke folur në mbledhjen e XXXVI-të Këshillit të Përgjithshëm, ku ritheksoi se synim i Lëvizjes Vetëvendosje do të vazhdojë të jetë eliminimi i pabarazisë në Kosovë.