Unaza e Re/ Protesta, Basha: Bashkohuni më 16 shkurt, t’i japim një grusht mu në zemër pushtetit korruptiv të Edi Ramës

Duke e vlerësuar Unazën e Re si shembulli më inkurajues, sot kryetari I Partisë Demokratike, Lulzim Basha, duke qenë pjesë e ditës së 89-të të protestës së banorëve të prekur nga projekti Unaza e Madhe, i bëri thirrje gjithë qytetarëve të Tiranës të bëhen bashkë, si një familje e madhe, dhe të marrin fatin në duart e tyre më 16 shkurt.

“Nga Shkodra në Vlorë, nga Kavaja në Korçë, qytetarët vlerësojnë qëndresën e banorëve të Unazës së Re, qëndresën e tyre të drejtë në mbrojtje të banesave të tyre, në mbrojtje të ligjit dhe të kushtetutës. Falë kësaj qëndrese sot është arritur një fitore tjetër. Ishte planifikuar që tenderi t’i jepej me vlerën e plotë, për të zëvendësuar kompaninë e kapur në flagrancë nga denoncimi i opozitës dhe denoncimet e medias, një kompanie tjetër, me 5 mln euro më tepër ofertë se oferta më e ulët,” tha Lulzim Basha duke shtuar se falë qëndresës së qytetarëve të Unazës së Re, sot shqiptarëve u janë kursyer 5 milionë euro, të cilat Edi Rama kishte në plan t’i vidhte e t’i çonte në parajsa fiskale.

Dhe jo vetëm kaq! Për shkak të kësaj qëndrese, ka përfituar çdo shqiptar, sepse deri më sot, frika që e ka kapur Edi Ramën e detyroi të tërhiqet edhe nga tenderi i dytë korruptiv për Unazën.

“Por sot ëshë dita të kujtojmë se akoma asnjë person i vetëm nuk ka marrë përgjegjësitë ligjore dhe penale për këtë aferë korruptive, e cila është shpalosur para syve të të gjithë botës me çmimin 20 milionë euro për kilometër dhe me zhvendosjen korruptive të Lumit të Lanës për projektin 60 milionë euro të pastrimit të parave të drogës trafikantit, mikut të Edi Ramës, Erion Veliajt dhe Taulant Ballës. Asnjë përgjegjës sepse shteti ka rënë, drejtësia është kapur dhe qeveria dhe Edi Rama kanë braktisur detyrën, kanë braktisur qytetarët, i kanë lënë në mëshirë të fatit, i dhunojnë, i tallin, i përbuzin.”

Në këtë situatë të rëndë, opozita e ka kryer detyrën e saj dhe i ka dalë borxh duke shterruar çdo hapësirë institucionale dhe politike, tha lideri i opozitës duke bërë thirrje  nga protesta e banorëve te Unaza e Re ndërkohë që në Këshillin Bashkiak Erion Veliaj po kalonte dy akte të tjera të rënda korruptive:

“Një akt korruptiv për të shembur një pjesë të Policisë Bashkiake dhe për t’ia dhënë për ndërtim një kompanie të akuzuar për lidhje me pushtetarët dhe pastrimin e parave të drogës dhe një tjetër akt korruptiv, për dhënien me koncesion të parkimeve në qytetin e Tiranës.”

Prokuroria, që fle gjumë mbi dosjet e krimit, duhet të nisë sot hetimin, edhe për shumat e mëdha të parave të krimit, që sipas burimeve të sigurta mediatike, tha kryetari i PD, Erion Veliaj do të shpenzojë për të blerë vota në Këshillin Bashkiak për të vjedhur pasuritë e qytetarëve shqiptarë, për të vjedhur pasuritë publike të Tiranës, dhe për të dhënë të tjera skema korruptive siç është zhvendosja e Lumit të Lanës, e tani me Policinë Bashkiake.

“Por i garantoj, as infiltrimi i sistemit të drejtësisë me bashkëpunëtorë të Sigurimit të Shtetit, as shantazhimi i organeve të reja të drejtësisë nuk ka për t’i shpëtuar. Këta njerëz, që janë bërë urë dhe mburojë për Edi Ramën, Erion Veliajn dhe politikanë të tjerë të korruptuar e të lidhur me krimin, do të ikin me turp, do të ikin me vrap nga bashkimi dhe mllefi popullor i 16 shkurtit”.

Drejtësia do të pastrohet dhe rinia e Astirit – mbani vesh – as Edi Rama, as Erion Veliaj nuk kanë për të shkuar në asnjë vend tjetër, përveçse në burgun 313, aty ku çuan me të padrejtë fëmijë 13 vjeçarë dhe nëna shtatzëna, sepse mbronin pragun e shtëpive të tyre, tha kryetari i Partisë Demokratike, Lulzim Basha, duke premtuar se nuk do t’i lejojnë të arratisen nga Shqipëria, por do të japin përgjegjësi para drejtësisë ndërsa përfundoi:  

“Bashkohuni masivisht me datë 16 shkurt, t’i japim një grusht këtij mali të korrupsionit, të vjedhjes, nëpërkëmbjes dhe poshtërimit, t’i japim një grusht mu në zemër pushtetit korruptiv të Edi Ramës dhe ta shtrijmë përdhe. T’ua kthejmë Shqipërinë shqiptarëve më 16 shkurt, të gjithë së bashku dhe të ndalim qeverinë më të korruptuar dhe të inkriminuar në këto 29 vite pluralizëm. Të ndalim këtë bandë hajdutësh. Nuk ka forcë tjetër që mund ta ndalë përveç qytetarëve të bashkuar. Zoti ju bekoftë ju dhe familjet tuaja.”