DPT, ja rastet kur mbledhet me forcë detyrimi tatimor

Drejtoria e Përgjithshme e Tatimeve, DPT, ka sqaruar se në cilat rastede klarohet dhe kryhet Deklarimi i pambledhshëm i detyrimeve tatimore, dhe si procedohet.

Procedurat për deklarimin e detyrimit tatimor si të pambledhshëm:

Deklarimi si i pambledhshëm i detyrimeve tatimore, është procesi i cili kryhet vetëm në raste ekstreme dhe nuk është arritur të mblidhet dhe të arkëtohet detyrimi tatimor.

Detyrimi tatimor mund të deklarohet i pambledhshëm vetëm në rastet e mëposhtme:

• Kur megjithëse është bërë shitja e investimeve likuide dhe aktiveve të tjera, nuk është bërë i mundur arkëtimi i detyrimit.

• Tatimpaguesi në bashkërendim me Administratën Tatimore provojnë me evidencë të saktë se tatimpaguesi nuk disponon asnjë lloj pasurie apo të ardhure, që do të mund të përdorej për shlyerjen qoftë edhe me këste të detyrimit tatimor të papaguar.

• Pas analizës së situatës financiare dhe pasurore të subjektit tatimpagues, Administrata Tatimore arrin në përfundimin se shitja e pasurisë së tatimpaguesit, ndaj të cilit do të fillonte një procedure likuidimi apo falimentimi, nuk do të shlyente shumën e detyrimit tatimor.

Kujdes, sugjeron DPT:
Që detyrimi tatimor të deklarohet i pambledhshëm, duhet që të trija pikat më lart të plotësohen në mënyrë të njëkohshme.

Fillimi i procedurave të falimentimi:

Fillimi i procedurës së falimentimit në gjykatë nga Administrata Tatimore, bëhet në përputhje me ligjin nr.110/2016 “Për Falimentimin”.

Administrata Tatimore në të cilën është regjistruar tatimpaguesi, ose në juridiksionin e të cilës ushtrohet veprimtaria ekonomike e tatimpaguesit, ka detyrimin të kërkojë në gjykatën kompetente, fillimin e procedurave të falimentimit. Për të gjithë ata tatimpagues, ndaj të cilëve Administrata Tatimore ka kërkuar fillimin e një procedure falimentimi, publikohen informacionet përkatëse në faqen zyrtare të Drejtorisë së Përgjithshme të Tatimeve.