Live/ Protesta e Opozitës së Bashkuara: Rama shporru!

Pak para nisjes së protestës së Opozitës së Bashkuar para Parlamentit të Shqipërisë, Forumi Rinor i Partisë Demokratike u kujdes të përçojë mesazhe paqeje duke i dhuruar lule policisë:

Polici kjo e stolisur me tela me gjemba, e cila ishte karikuar që dje nga Kryeministri Edi Rama dhe Ish-Gjeneral Sandër Lleshaj për dhunë dhe arrestime të protestuesve.

Dhe mbërrijnë banorët e Unazës së Re me thirrjet kundër Kryeministrit Rama dhe kryetarit të Bashkisë së Tiranës, Erion Veliaj.

Protestës i bashkohet edhe kryetari i Partisë Demokratike, Lulzim Basha, i shoqëruar nga deputetët:

“Beteja do të vazhdojë deri sa shqiptarëve t’u kthehet parlamenti i zgjedhur nga vota e tyre, dhe të hapen dyert për t’i çuar ata drejt Evropës. Udhëhiqemi nga respekti për lirinë, demokracinë, të drejtat e njeriut, ndaj e sotmja është ditë shprese, dita e rrugëtimit drejt Shqipërisë europiane”, tha Basha ndërsa po I afrohen sheshit para Parlamentit të Shqipërisë nga turma dëgjoheshin thirrje: Rama ik! Rama shporru.

Protestën e hapë deputeti i PD, Ervin Salianji:

“Ne në datën 16 dëgjuam zërin tuaj, zërin e qytetarëve, zërin e votuesve. Mandati jonë, mandati im, Ervin Salianji ju takon sot juve, i takon qytetareve. Fitore!”

Për dallkaukun e përparimit, mesazh kishte edhe lideri i PDIU, Shpëtim Idrizi:

“Jam sot këtu për ti thënë dallkaukut të përparimit: hapi rrugë shqiptarëve, zgjedhjeve të lira sepse shqiptarët do ta marrin vetë fatin e tyre në dorë. Nëse detyrove 4 mijë shqiptarë të iknin nga Shqipëria, sot ka ardhur koha të ikësh ti. Shqiptarët janë të gatshëm siç larguan komunizmin të të largojnë dhe ty. Nuk mundet taksat e shqiptarëve të shkojnë tek duart e pesë vetëve. I them o 99-sh largohu ose shqiptarët do të punojnë 100-in”, tha Idrizi.

Deputeti i PD, Klevis Balliu, duke iu bashkuar thirrjeve Rama ik shtoi se fuqia tashmë është e popullit.

“Të dashur qytetarë fuqia është e juaja, jemi mbledhur për t’i thënë këtij krimineli: Rama ik! Koha e bandave mori fund, është koha juaj, merrni në dorë fatet e vendit. Rama ik!”, tha Balliu. “Më ka sjellë në Kuvend, Kukësi, Hasi e Tropoja, më kanë dhënë një porosi, pakt me krimin kurrë. Rama ik se ti ke bërë pakt me krimin, je përfaqësues i perversitetit. Koha jote mbaroi, nuk të lejojnë shqiptarët më, shumica të përbuzin, nuk pranojnë në krye një njeri me probleme të rënda psiqike,” tha deputeti i PD, Flamur Noka duke vazhduar me deputetët tjerë të opozitës që me radhë po dorëzonin publikisht mandatet.