Presidenti Trump: Bisedimet me Kimin dështuan për shkak të sanksioneve
Samiti në mes të presidentit amerikan, Donald Trump dhe liderit koreanoverior, Kim Jong-un ka përfunduar pa marrëveshje, pasi Shtetet e Bashkuara kanë refuzuar kërkesat e koreanoveriorëve për të hequr sanksionet ndaj shtetit të tyre, raporton RFE.
“Ka pasur të bëjë me sanksionet”, ka thënë Trump në një konferencë për media. Ata kanë kërkuar që sanksionet të heqen në tërsi dhe ne nuk mund ta bëjmë atë”, shtoi ai.
Të dy liderët është pritur që të njoftojnë për përparimin e bërë në negociatat për denuklearizim.
“Ndonjëherë duhet të largoheni dhe ky ka qenë një nga ato raste” ka thënë Trump.
Duke folur në një konferencë për media në Hanoi, presidenti amerikan ka njoftuar se nuk ka plane për mbajtjen e një Samiti të tretë me Kimin.
Sipas programit të Shtëpisë së Bardhë, sot ishte parashikuar të organizohet “Ceremonia e Nënshkrimit të Marrëveshjes së Përbashkët”, si dhe një drekë pune në mes të dy liderëve, mirëpo pritshmëritë janë shuar, kur të dyja ngjarjet janë anuluar në mëngjesin e së enjtes.
Sipas Presidentit Trump, lideri koreanoverior ka pasur gatishmëri për të shkatërruar kompleksin, Yongbyon, zonë për zhvillimin dhe testimin e programit bërthamor të Koresë Veriore, mirëpo ka kërkuar lirim nga të gjitha sanksionet, diçka për të cilën SHBA-ja nuk ka qenë e gatshme.
Megjithatë dy liderët është thënë të kenë pasur diskutime përmbajësore sikurse në samitin e parë, të mbajtur në qershor të vitit të kalur në Singapor.
Çfarë nënkuptohet me “denuklearizim”?
Aktualisht çështja më e diskutueshme mbetet se si të dyja palët e interpretojnë denukealizimin.
Washingtoni ka thënë më parë se Korea Veriore duhet të heqë dorë njëanshëm nga armët bërthamore, në mënyrë që të lirohet nga sanksionet, derisa është po kjo pikë që ka krijuar bllokadë për verikoreanët.
I pyetur në një konferencë për media sot se çfarë nënkupton me denuklarizim, Presidenti Trump sqaroi:
“Për mua është shumë e qartë, duhet të lirohemi nga armët bërthamore”.
Presidenti Trump tha se delegacioni amerikan ka disa mundësi për të shqyrtuar mirëpo tani ka vendosur të mos e bëjë një gjë të tillë dhe se është optimist, si dhe ka theksuar se bisedimet i kanë vendosur të dyja shtetet në një pozitë për arritjen një rezultati të mirë në të ardhmen.
Pavarësisht mosarritjes së një pakti në Hanoi, samiti i dytë Trump-Kim ka shpërfaqur edhe një herë marrëdhënie të përmirësura në mes të të dyja kombeve.
Në fund të vitit 2017, liderët e këtij samiti patën shkëmbyer kërcënime, pasi Trump e pati cilësuar Kimin “njeri të raketave”, derisa Kim pati thënë se Trump ka “probleme mendore”.
Mirëpo duke folur sot në Hanoi, Trumptha se Kim është njeri i mirë me karakter dhe e ka përshkruar lidhjen e tyre si shumë të fuqishme.
Para mbajtjes së samitit, ka pasur zëra për përfundimin zyrtar të Luftës Koreane, të viteve 1950-1953, e cila ka përfunduar me një armëpushim në vend të ndonjë traktati të plotë të paqes.
Përveç tjerash, ka pasur edhe shpresa se Kim mund të zotohet për të shkatërruar kompeksin bërthamor Yongbyon, i cili gjendet në zemër të programit bërthamor të koreanoveriorëve
