“KMSH që Duam”/ Snajpera dhe fotografë në maje të Xhamisë, Shehu: Të hetohet…

Ish-Gjeneralit të Edi Ramës që u vendos në krye të Ministrisë së Brendshme nuk i mjaftuan pallatet përreth që kishte mbushur me policë nga më të ndryshëm, prej snajperëve deri tek operatorët e dronit, që ishin angazhuar gjatë gjithë protestës, por shfrytëzuan edhe minaren e Xhamisë së Madhe pranë Palamentit për survejim nga specialistët policor.

Pas këtij akti të turpshëm të Sandër Lleshajt, ka reaguar deputeti i PD, Tritan Shehu, duke publikuar dhe fotot të këtyre “specialistëve të policisë” që kishin hipur mbi godinën e re të Xhamisë së Madhe, ku po fotografonin protestuesit.

“Institucionet fetare nuk janë mjedise ku shteti mund të vendosë “specialistë” e mjete të sofistikuara për të përgjuar masën e njerëzve, që proteston afër tyre pikërisht kundër mos respektimit të të drejtave etj, nga qeverisja.

Pamjet që duken nga Xhamia pranë Kuvendit gjatë protestës së sotme, flasin vetë. Ndërsa disa ditë më parë po kjo Rilindje u akuzua për tentativë “futje duarsh” në proceset e votimit pikërisht të Komunitetit Musliman,” thekson Tritan Shehu përmes rrjetit social Facebook duke shtuar:

“Dikush duhet të ngrejë zërin e të protestojë për këtë mungesë respekti ndaj këtyre strukturave, shpërdorim të pushtetit, që në realitet kështu mund t’i komprometojë edhe  ato institucione të nderuara, të besueshme e larg politikës”, ndërsa përfundon:

“Në mënyrë absolute kjo ndodhi e shëmtuar dhe e përsëritur duhet të bëhet objekt i një procesi hetimor serioz e të thelluar!”

Kështu, pas “Kryeministrit që Duam”, “Ish-Gjeneralit që Duam”, “Gazitlotsjellësit që Duam” tani kemi edhe “KMSH që Duam” ndonëse kjo e fundit mendohej se është reformuar, dhe sot me heshtjen e saj konfirmoi se i është nënshtruar tërësisht kryeministrit Edi Rama.