Rifat Jashari: Ushtria e Kosovës ta mbrojë territorin siç e mbrojti UÇK-ja

Në 21-vjetorin e shënimit të Epopesë së Lavdishme të Ushtrisë Çlirimtare të Kosovë, përfaqësuesi i familjes Jashari, Rifat Jashari, tha se për herë të parë Kosova po e shënon këtë Epope me ushtrinë e saj.

Duke e uruar Ushtrinë e Kosovës, Rifat Jashari ka kërkuar që ta mbrojnë territorin ashtu siç e mbrojti UÇK-ja.

“Ushtrisë së Kosovës i dëshiroj shëndet dhe lumturi që gjithmonë të jenë të gatshëm të mbrojnë territorin e Kosovës ashtu siç e mbrojtën edhe ushtarët e UÇK-së,” tha përfaqësuesi i familjes Jashari, Rifat Jashari, në fjalën e tij.

Thaçi: Me sakrificën e Jasharëve, bota kuptoi drejt Kosovën

Presidenti i Kosovës në ceremoninë e shënimit të 21-vjetorit të Epopesë së Lavdishme të Ushtrisë Çlirimtare të Kosovë, tha se me nderimet më të larta shtetërore sot kujtohet sakrifica e pashembullt e familjes Jashari në krye me komandantin legjendar Adem Jashari, sakrificë sublime kjo e cila bëri kthesë të jashtëzakonshme në nivel kombëtar dhe ndërkombëtar të çështjes së Kosovës.

“Bota filloi ta kuptojë drejt Kosovën. Epopeja e UÇK-së dëshmoi se kthim prapa nuk kishte në luftën tonë për liri dhe çlirim. UÇK-ja u bë projekti më madhor kombëtar në historinë e kombit shqiptarë. Sot dhe gjithmonë nderojmë të gjithë dëshmorët e lirisë, invalidët, veteranët dhe gjithë qytetarët që u sakrifikuan për çlirimin e Kosovës. Nderojmë diasporën, që dhanë gjithçka për liri”, tha presidenti.

Presidenti i Kosovës në fjalën e tij në ceremonisë ushtarake të FSK-së për nder të Epopesë së UÇK-së ka kujtuar spastrimin etnik të përmasave të gjenocidit nga Serbia.

“Kujtojmë 13.500 civil shqiptarë të vrar,  400 masakra kundër shqiptareve,  20.000 gra te dhunuara shqiptare.”

Në këtë 21 vjetor, tha Thaçi, për herë të parë Epopeja  e Ushtrisë Çlirimtare po  shënohet me Ushtrinë e Kosovës, të njohur edhe ndërkombëtarisht, si forcë moderne, profesionale dhe multietnike.

Ecja e Kosovës përpara është e pandalshme, tha Presidenti i Kosovës, derisa po konsolidohemi në rrafshin e brendshëm dhe atë ndërkombëtarë, ndërsa përfundoi:

“Të bashkuar si popull dhe institucione kemi energji që të bëjmë hapa gjigand. Të bashkuar miqtë do të na përkrahin edhe më shumë. Kosova në të ardhmen e afërt do të bëhet pjesë e NATO-së e Bashkimit Evropian, OKB-së dhe do ti forcojmë raportet speciale me Shtetet e Bashkuara të Amerikës.”

Haradinaj: Do ta ndërtojmë vendin që e deshën dëshmorët

Kryeministri i Kosovës, Ramush Haradinaj duke kujtuar Epopenë e UÇK-së tha se në marsin e vitit 1998 në mes të Evropës u shua një familje e tërë, por u zgjua bota.

Duke folur në ceremoninë ushtarake që FSK-ja ka organizuar për nder të Epopesë, Haradinaj tha se të shërbesh në FSK është nder dhe privilegj.

Kjo ushtri vjen në paqe, tha Haradinaj, dhe nuk do të përdoret kundër popullit të Kosovës as në jug as në veri, ndërsa përfundoi:

“Në partneritet me aleatët tanë do ta ndërtojmë vendin që e deshën çlirimtarët!”

Ndryshe, me rastin e 21 vjetorit të rënies heroike të Komandantit Legjendar Adem Jashari dhe Familjes Jashari, Qeveria e Republikës së Kosovës, me 5, 6 dhe 7 Mars 2019, organizon manifestimin gjithë-popullor në nderim të Epopesë së Ushtrisë Çlirimtare të Kosovës dhe në kujtim të Komandantit legjendar Adem Jashari, familjes Jashari dhe gjithë dëshmorëve të kombit, si dhe të gjithë të rënëve për liri dhe pavarësinë e vendit dhe popullit tonë.

Programi i manifestimit:

1. Me dt.5 Mars 2019
• Në të gjitha shkollat e Republikës së Kosovës ora e parë e mësimit i kushtohet ,,Epopesë së UÇK-së’’, rënies heroike të Komandantit Legjendar Adem Jashari, familjes JASHARI dhe të gjithë të rënëve të tjerë për LIRI.

• Në Kazermën “Adem Jashari” në Prishtinë, në ora 11:00 do të mbahet ceremoni ushtarake e FSK-së.

2. Me dt. 6 Mars 2019
• Nga ora 10:00, do të bëhen homazhe pran varrit të Komandantit Legjendar Adem Jashari dhe varrezave të familjes Jashari, në Kompleksin Memorial “Adem Jashari” në Prekaz të Komunës së Skenderajt.

• Nga ora 12″00, të behën homazhe në të gjitha Komplekset Memorialë të Dëshmorëve të UÇK-së në Republikën e Kosovës.

• Nga Kuvendi i Republikës së Kosovës në ora 15:30, realizohet Seanca Solemne e cila do ti kushtohet ,,Epopesë së UÇK-së’’, rënies heroike të Komandantit Legjendar Adem Jashari, familjes JASHARI dhe të gjithë të rënëve të tjerë për LIRI.

• Në ora 18:00, në Teatrin Kombëtarë do të mbahet ,,Akademi Përkujtimore’’ kushtuar Komandantit Legjendar Adem Jashari, familjes Jashari dhe gjithë dëshmorëve dhe të rënëve për liri.

3. Me dt.7 Mars 2019 • Nga ora 17:45, në Komunën e Skenderajt do të mbahet Manifestimi ,,Nata e Zjarreve’’, ku fillimisht në Kompleksin Memorial “Adem Jashari”, do të ndezën flakadanët dhe me pas ne Sheshin “Adem Jashari’’do te mbahet një program kulturor-artistik