“Babalja”/ Salianji në Prokurori: I pandehur për agjitacion, trafikanti që denoncova është në burg!
Ish-Deputeti i PD, Ervin Salianji, sot pasi doli nga Prokuroria e Tiranës, ku ishte thirrur në cilësinë e të pandehurit për dosjen “Babale”, nga prokurorët Genci Qano dhe Kol Hysenaj, tha se nuk është bërë asnjë hetim, ka denoncuar një trafikant ndërkombëtar droge që sot është në burg, e i proceduar është Salianji.
“Nuk ka pasur asnjë hetim për të akuzuarit. Unë u mora si i pandehur se denoncova një trafikant,” tha Salianji duke sqaruar situatën:
“Denoncova një trafikant ndërkombëtar droge që sot është në burg, por i proceduar jam unë. Pasi të njihemi me aktet e dosjes do ja bëjmë publike, duhet të kishte hetim për Ballën, Veliun dhe Xhafën por kjo është si kronikë e kohëve të vjetra. Mund të fliste TVSH e kohëve të vjetra dhe të thoshte që elementët agjitatorë arritën të fusnin në burg një socialist. Unë akuzohem për agjitacion në bashkëpunim me gazetarin Olldashi.”
Ndryshe, Gjykata ka urdhëruar organin e akuzës që brenda datës 20 mars të përfundojë hetimet për çështjen ndaj deputetit të PD-së, Ervin Salianji. Për këtë çështje, në hetim janë edhe Albert Veliu i njohur si Babalja, personi që imitoi zërin e Agron Xhafës, Fredi Alizoti dhe gazetari Jetmir Olldashi.
