Blerim Reka: Synoj rikthimin e besimit në shtet!

Kandidati i pavarur shqiptar për president të Republikës së Maqedonisë së Veriut, Blerim Reka, ka bërë me dije se arsyeja intelektuale dhe kombëtare e ka shtyrë t’i hyjë garës për president në zgjedhjet e 21 prillit. Ai e ka quajtur sfidë garën për president për faktin se ka përballë dy kandidatë fuqimisht të përkrahur.

Në një intervistë për të përditshmen “Epoka e re”, Blerim Reka thekson se kthimi i rendit republikan dhe depersonalizimi i shtetit është synimi kryesor i mandatit të tij presidencial. 

Pavarësisht prej vështirësive, ai është zotuar se do ta jetësojë vizionin për një republikë shumetnike dhe euroatlantike. 

Reka ka thënë se qytetarët e Maqedonisë së Veriut duhet ta votojnë atë më 21 prill meqë synon rikthimin e besimit në shtet. 

Sipas tij, vota e tyre do të jetë votë për parandalimin e shndërrimit të Maqedonisë së Veriut në shtet të zbrazët.