Video-përgjimi i Xhafajt/ Ekspertiza do të bëhet nga një laborator i huaj, a është ai që paralajmëroi Rama…

Prokuroria e Krimeve të Rënda do të kërkojë ndihmë nga jashtë për t’I bërë ekspertizën audio-përgjimit tashmë të publikuar ku shfaqet Agron Xhafaj, vëllai i ministrit të Brendshëm, Fatmir Xhafaj.

Mësohej se materiali do të dërgohet jashtë vendi në një laborator të specializuar për t’iu nënshtruar ekspertizës mbi autencitetin e tij, por edhe për të provuar nëse zëri që dëgjohet është ose jo i Agron Xhafajt. Organi i akuzës ka regjistruar zërat e Agron Xhafajt dhe Albert Veliut, por nuk dihet nëse regjistrimi ka ndodhur me të njëjtat mjete dhe kushte ambientale, sikundër kanë qenë në video-përgjimin e publikuar pak ditë më parë.

Paraprakisht Kryeministri Edi Rama dhe ministri i Brendshëm, Fatmir Xhafaj, kanë deklaruar me bindje se video nuk është autentike, madje për këtë i referohen një laboratori të huaj, por pa përmendur se cili është ai. Nuk dihet nëse organi i akuzës do të zgjedhë ose jot ë njëjtin laborator për të cilin kanë folur tashmë Rama dhe Xhafaj, pasi asnjë prej institucioneve nuk pohon emrin e tij.

Agron Xhafaj ka depozituar në Prokurorinë e Tiranës një kallzim penal ndaj zyrtarëve të Partisë Demokratike që bënë publik audio përgjimin, por dosja ka kaluar tek Krimet e Rënda, të cilat kanë nisur një hetim krzesisht lidhur me këtë material.

Prokuroria e krimeve të rënda pas publikimit të audio përgjimit regjistroi procedimin penal kryesisht për trafik droge. Pas sekuestrimit të materialit audio në selinë e partisë demokratike oficerët pyetën për më shumë se 6 orë Albert Veliun ose të njohur ndryshe si “dëshmitari X”.

Prokuroria ka kërkua dhe marrjen në pyetje të deputetëve të partisë demokratike të cilët bënë publik audio përgjimin ndërsa deklarimet e tyre pritet të zhvillohen të hënën.