Opozita e vendosur/ Edi Rama ndryshon strategji, krijon tensione…
Pas djegies së mandateve nga ana e deputetëve të opozitës, në kulmin e presioneve ndërkombëtare kur Opozita e Bashkuar vazhdoi me protestat dhe kryeministri Edi Rama me krijimin e “Opozitës së Edi Ramës”, kriza politika vetëm sa u thellua ndërkohë opozita u tregua e vendosur në realizimin e qëllimeve të saj duke mos u bërë pjesë as e procesit për përgatitjen e zgjedhjeve lokale të vitit 2019.
Në këtë situatë, kur as Ambasadori i OSBE në Tiranë nuk arriti të bindë opozitën se duhet i nënshtrohet kryeministrit vetëm pse këtë e kërkojnë ndërkombëtarët, misioni faktmbledhës i OSBE/ODIHR po qëndron në Tiranë në mënyrë që të bëjë vlerësimin real të situatës.
Dhe pikërisht sot kur Opozita e Bashkuar e bëri të qartë se do të organzioj protesta të enjten kur Konferenca e Kryetarëve vendosi të zhvilloj seancë plenare, kryeministri Edi Rama ndryshon strategji.
Sot, Gjykata ka dhënë vendimet për 33 personat e proceduar nga policia pas protestës së 16 Marsit. Kështu u lanë në burg 4 nga protestuesit e arrestuar ndërsa 10 të tjerë janë liruar nën masën detyrim paraqitje. Nën masën arrest me burg u lanë: Gazmir Bekshiu, Aldi Spaho, Ermir Bruka dhe Pal Daija. Me detyrim paraqitje u lanë të lirë 10 protestuesit: Edison Tahiri, Klajdi Poci, Denaldo Buzi, Eduard Buzi, Elidjan Buzi, Florian Zeneli, Jeton Spahiu, Ali Bruci, Kevin Kastrati dhe Flamur Rrahja ndërkohë vijojnë të jenë në kërkim 7 persona, pjesëmarrës në protestë.
Dhe, po sot, Prokuroria e Tiranës ka thirrur ditën e enjte kryetarin e Partisë Demokratike, Lulzim Basha, për të dhënë, siç thuhet, pretendimet dhe shpjegimet e tij, në lidhje me kontratat e lobimit në SHBA. Ky veprim i akuzës së Tiranës, mësohet se vjen pas mbërritjes dhe përkthimit të plotë të letër-porosive nga Shtetet e Bashkuara. Pse pikërisht të enjten, këtë nuk e bëjnë të qartë as mediat e afërta me Edi Ramën që lançuan këtë lajm nga Prokuroria; Vetëm se thuhet që do të kërkohet versioni i zyrtarëve të PD për 4 kontrata të lidhura me një kompani të huaj me qëllim promovimin e kauzës së PD dhe liderit të saj kur opozita ishte e ngujuar në çadrën e protestës.
Por dita e 19 Marsit nuk do të përfundoj me këtë provokim primitiv të Edi Ramës përmes Prokurorisë. Dita e 136 e protestës së banorëve tek Unaza e Re të prekur nga projekti Unaza e Madhe u shndërrua në një skenë tensioni në mes të policisë dhe protestuesëve, shpërthimin e së cilës arriti ta shpëtoi vetëm ndërhyrja e kryetarit të Partisë Demokratike, Lulzim Basha.
Policia e Ish-Gjeneral Sandër Lleshajt me urdhër të Edi Ramës rrethoj zonën e Unazës së Re me qëllim për të arrestuar disa nga protestuesit dhe për ta mbyllur përfundimisht protestën. Banorët u alarmuan, kërcënuan Ministrin e Brendshëm, Sandër Lleshaj, që të ketë kujdes me durimin e tyre, pasi do të shikojë një protestë para policisë që se ka parë kurrë ndërkohë u kanë bërë thirrje edhe Ambasadave të huaja në Tiranë për ndihmë. Policët u tërhoqën pas ndërhyrjes së Lulzim Bashës, por banorët e kësaj zone, që njohin më mirë se askush në Shqipëri, Edi Ramën, meqë i kishin dhënë votën, theksuan se ata do të vazhdojnë të jenë në gjendje gatishmërie duke mos qenë të sigurtë se çfarë mund të sjellë nata.
Ndërkohë ditët në vijim do të jenë po aq të paparashikueshme pikërisht për këtë fakt, se kryeministër është Edi Rama!
