Beteja vazhdon, gati për protestën e 28 Marsit!
Ndonëse presioni dhe terrori policor është i madh në të gjitha qarqet, opozita ka finalizuar përgatitjet për protestën e 28 Marsit përpara Parlamentit të Shqipërisë ku pritet të filloj në orën 09:30, ashtu siç është vendosur edhe nga Kolegji i Kryetarëve të PD bazuar në vendimin e Kryesisë së Partisë Demokratike.
Në Tiranë gjithçka është gati për protestën e 28 Marsit para Parlamentit të Shqipërisë, të palëkundur si gjithmonë se të gjithë bashkë, sjellim më afër ndryshimin.
“Edhe pse motivimi i qytetarëve është i madh për t’i qëndruar deri në fund kauzës, për largimin e Edi Ramës, strukturat e Partisë Demokratike, janë aktive për t’i qëndruar krahë qytetarëve, e për të mbështetur deri në fund këtë kauzë,” thekson Ish-Deputetja e PD, Orjola Pampuri, pas mbledhjes së kryesisë së Degës 3, Tiranë.
Ashtu si edhe në Njësinë 2. ku tashmë kanë pëfunduar takimet dhe mesazhi është i qartë:
“Asnjë hap mbrapa!”
“Nesër të gjithë bashkë përsëri për të protestuar,me një qëllim të vetëm, largimin e kësaj qeverie sa më parë,” thekson kryetari i Partisë Demokratike Dega Shkodër, Xhevdet Amuli, duke i bërë thirrje demokratëve shkodranë:
“Nesër në orën 9:30 para parlamentit do të protestojmë kundër pushtetit ilegjitim që çdo ditë e më shumë po varfëron shqiptarët. Kundër pushtetit që po rrit taksat e po mbyll bizneset. Kundër pushtetit,që rinisë ia ka prerë të gjitha ëndrrat për një Shqipëri ku ato të studiojnë e të punojnë njësoj si në vendet europiane. Kundër pushtetit që po bashkëqeveris me krimin. Kundër pushtetit që nuk e do asnjë shqiptar,” thekson Xhevdet Amuli duke paralajmëruar nisjen e organizuar për nesër:
“Nisja nga Shkodra do të bëhet në orën 6 e 30,në pikat : Sheshi parat teatrit “Migjeni”, tek Kisha e Madhe dhe tek sheshi “Isa Boletini”.”
Thirrje për ditën e enjte datë 28 Mars 2019 ora 9:30 përpara Parlamentit, e bënë edhe Dega e PD Fushë Krujë me mesazhin e veçantë se beteja në rrugën pa kthim vazhdon:
“Të gjithë bashkë të protestojmë për Shqipërinë që meritojmë, Shqipërinë si e gjjthë Europa. Protestojmë për vete, për fëmijët, për prindërit, për çdo shqiptar që përpiqet përditë e më shumë dhe s’po ia del dot.”
Ndërkohë përgatitjet e fundit po finalizohen në Lezhë, Kukës, Lushnje, Fier, Vlorë, Korçë dhe qarqet tjera ndonëse presioni i policisë është shumë i madh, për të vështirësuar tubimin dhe mbledhjen e protestuesëve në të gjitha qarqet.
