“Opozita e Edi Ramës”, KQZ u jep mandatin edhe tre deputetëve

Pas dorëzimit të mandatit nga ana e deputetëve të opozitës, Komisioni Qendror i Zgjidhjeve, KQZ, ka vazhduar procesin e themelimit të “Opozitës së Edi Ramës” duke i dhënë sot mandatin edhe 3 kandidatëve për deputetë, dy nga PD dhe një nga LSI.

Kështu vendin e Edmond Spahos në Elbasan e merr Arben Elezi, ndërsa Adriatik Alimadhi do të zërë vendin e Agron Shehajt në listën shumë emërore të Vlorës. Ndërsa nga radhët e LSI, Agron Çelaj, zëvendësohet në Shkodër me Amra Barovën.

Betimi i 3 deputetëve të rinj pritet nesër në seancë plenare, duke e çuar numrin e deputetëve në Parlament në 99, ku 17 prej tyre janë të rinj nga listat e PD dhe LSI, ose ndryshe njihen edhe si “Opozita e Edi Ramës”.

Kështu listave të kandidatëve në disa qarqe po i vjen fundi. Në Kukës, Partia Demokratike nuk ka më kandidatë, pasi KQZ ka shpallur pazgjedhshmërinë edhe për të fundit në listë, Miftar Dauti. Gjithashtu KQZ ka shpallur pazgjedhshmërinë edhe për 10 kandidatë të tjerë në Gjirokastër, Korçë, Lezhë, Shkodër dhe Tiranë. Ndërsa për LSI-në dy kandidate femra, njëra në Berat dhe tjetra në Tiranë nuk kanë dorëzuar formularin e dekriminalizimit në KQZ.