Beteja vazhdon, Basha: Deri në çlirimin e Shqipërisë!
Zgjedhje me Edi Ramën nuk do të ketë! Këtë e bëri të qartë kryetari i Partisë Demokratike, Lulzim Basha, në fund të protestës së Opozitës së Bashkuar para Parlamentit të Shqiëprisë, duke shtuar se pakt me Maduron e Ballkanit nuk do të ketë!
“Kjo betejë ka nisur për çdo shqiptar, ka nisur për të çliruar Shqipërinë nga korrupsioni më i thellë, për t’i kthyer qeverisjen çdo shqiptari dhe nuk do të ndalet derisa të bëhet realitet,” tha Lulzim Basha ndërsa ripërsëriti se askush nuk pjesë e kësaj beteje për karrige, pushtet dhe aq më pak për pazare.
“Askush në këtë kryengritje popullore nuk është këtu për karrige, pushtet dhe aq më pak për pazare. Por për t’i dhënë njëhërë e mirë fund pazareve në kurriz të popullit, demokracisë, i vetmi Pazar që ka mbetur në Tiranë është pazari i gjësë së gjallë, kopja e shëmtuar e pazarit të Milotit, që po e merr përpara vala e shqiptarëve të bashkuar.”
Shpresa për një ndryshim, tha lideri i opozitës, fillon me largimin e kryehajdutit Edi Rama dhe nuk mbaron aty.
“Të gjithë ne i kemi një borxh Shqipërisë, ndaj zotohem sot para jush, vëllezër dhe motra të sakrificës, që largoheni shpeshherë me buzë të thara dhe pa ngrënë se nuk ka forcë në botë t’ju tradhtojë ju, këtë lëvizje për liri e demokraci të standarteve europiane se do të bëhet realitet verdikti juaj për Shqipërinë si gjithë Europa!”
Me ju në shi e në diell! Me ju në agim e muzg! Me ju do të jem gjithmonë unë dhe opozita e bashkuar, u zotua kryetari i Partisë Demokratike në përfundimt të protestës së Opozitës së Bashkuar:
“Nuk do t’ju braktisim në ëndrrën tuaj më të bukur, që fëmijët e shqiptarëve të gëzojnë lirinë dhe mirëqënien europiane këtu në Shqipëri. Kjo është beteja për të cilën luftojmë, çohemi çdo mëngjes dhe do ta vazhdojmë deri në fitore, deri në çlirimin e Shqipërisë nga grushti i shtetit që i ka dhënë fund institucioneve demokratike, ka shkatërruar parlamentin, ka asgjesuar drejtësinë, ka kapur dhe ka blerë ekranet kryesore të mediave, të cilat për faqen e tyre të zezë me paratë e narkotrafikut kanë braktisur interresin publik,” përfundoi kryetari I PD, Lulzim Basha me mirënjohje për gazetarët dhe turp për pronarët oligarkë të mediave, dhe ndjesë në emër të Partisë Demokratike, për ata që u bënë milionerë në pushtetin tonë, mbi gjakun, sakrificën tuaj dhe të shqiptarëve të ndershëm. Ora e drejtësisë po afron!
