“Escobari i Ballkanit”/ Pretenca, Prokuroria: 18 vite burg!
Pas dështimit të tri seancave gjyqësore kundër Klement Balilit i njohur si “Escobari i Ballkanit”, sot pasi janë lexuar akuzat, prokuroi Eneid Nakuçi ka kërkuar dënimin me 18 vite burg.
Duke pasur parasysh se Gjykata për Krimet e Rënda ka pranuar kërkesën e Balilit për gjykim të shkurtuar, në rast të shpalljes fajtor kjo i jep atij të drejtën që të përfitojë uljen e dënimit, e që dënimi i kërkuar shkon në gjithsejë 12 vite burg.
Prokurori Ened Nakuçi, tha se Klement Balili është në akuzë vetëm për rastin e trafikut të rreth 700 kg canabis sativa, ndërsa si prova u paraqitën një sërë përgjimesh.
Kështu, Prokuroria e Krimeve të Rënda, kërkoj deklarimin fajtor të Klement Balilit për trafik lëndësh narkotike, deklarimin fajtor për pastrim parash dhe dënimin, deklarimin fajtor për fshehje të pasurisë dhe deklarimin fajtor për grup kriminal.
Konkluzionet e mbrojtjes do të lexohen në seancën e cila do të zhvillohet në 23 prill, në orën 12:30.
Hetimet
Më shumë se dy vite kanë zgjatur hetimet për njeriun, që shpesh është konsideruar si “Escobari i Ballkanit”, ndërsa pjesa më e madhe e hetimeve, duket se është e bazuar në përgjigjet e marra nga letërporositë e dërguara në Greqi. Prokuroria për Krime të Rënda ka një sërë përgjimesh të grupit, ku Balili dyshohet se ka qenë një nga financuesit.
Emri i këtij të fundit, si i përfshirë në trafikimin e lëndëve narkotike, është lakuar nga politika dhe media greke, në momentin që ai ishte në krye të Drejtorisë së Transportit Rrugor në Sarandë, në vitin 2016. Pas këtyre të dhënave, të bëra publike në atë kohë, Prokuroria e Krimeve të Rënda me shkresë Nr.112/ 1 prot, datë 11.05.2016, kërkoi përcjelljen e letërporosisë për ndihmë juridike, drejtuar autoriteteve greke të drejtësisë, për të marrë informacion për Klement Balilin.
Referuar dosjes hetimore, ka qenë rasti i trafikimit të një sasie prej 700 kilogramësh kanabis sativa nga Saranda drejt një ishulli në Greqi, që kanë nxjerrë Balilin në përgjimet e autoriteteve greke. Sipas këtyre përgjimeve, dyshohet se Klement Balili mbante kontakte me dy skafistë dhe pritësin e sasisë së lëndës narkotike në Greqi. Pritësi rezultoi të ishte një biznesmen në shtetin fqinj dhe është vënë në pranga gjatë këtij operacioni, së bashku me dy skafistët, ndërsa në atë kohë është bërë edhe shpallja në kërkim e Klement Balilit.
“Me shkresë Nr.4264KL/6, Prot. FKB, datë 17.05.2016 të Ministrisë së Punëve të Brendshme (Zyra Qendrore Kombëtare Interpol Tirana) ka njoftuar Ministrinë e Drejtësisë dhe ka vënë në dijeni Prokurorinë e Përgjithshme ‘Mbi shpalljen në kërkim ndërkombëtar nga Interpol-Athina’, po në datë 17 maj 2016 të shtetasit shqiptar Klement Balili, në bazë të urdhërarrestit nr.FE7698, viti 2016, për veprën penale ‘Krijim dhe drejtim Organizate Kriminale’”, njoftonte dy vite më parë Ministria e Drejtësisë.
Sekuestrimi i pasurisë
Në muajin nëntor të 2017-ës, Gjykata për Krime të Rënda pranoi kërkesën e Prokurorisë për sekuestrimin e pronave të Klement Balilit. Kështu, në datën 24 nëntor Policia ekzekutoi vendimin duke vënë nën sekuestro hotelin “Santa Quaranta”, disa metra katrorë truall dhe 36 apartamente. “Policia e Shtetit ka ekzekutuar vendimin e Gjykatës së Shkallës së Parë për Krimet e Rënda, të pasurive në emër të Klement dhe Bashkim Balilit, që janë: ish-kampi i Pushimit të Punëtorëve në Sarandë, aktualisht hotel ‘Santa Quaranta’; 28,690 m2 truall; 36 apartamente e njësi shërbimi, me rreth 2.178 m2 sipërfaqe.
Këto pasuri të sekuestruara do të administrohen dhe përdoren nga Agjencia e Administrimit të Pasurive të Sekuestruara dhe të Konfiskuara, pranë Ministrisë së Financave dhe Ekonomisë”, njoftoi Policia e Shtetit. Vendimi për sekuestrimin u apelua nga familja e Balilit, të cilin e kishin konsideruar si të padrejtë, por edhe pse çështja u çua në Gjykatën e Apelit të Krimeve të Rënda, kjo e fundit, në shkurt të 2018-ës la në fuqi vendimin e Shkallës së Parë.
