Grabitja në Aeroportin e Rinasit, Policia jep detajet…

Pas grabitjes në Aeroportin e Rinasit, ku një orë më parë dyshohet se u grabitën rreth 2 milion euro, një prej grabitësve u vra dhe një furgon është gjetur i djegur në zonën e njohur si “Kodra e Kuqe” pranë Babrrusë, në Kamëz që mendohet se është mjeti me të cilin u krye grabitja, ka reaguar edhe Policia e Shtetit.

Policia e Shtetit sqaron se persona me maska kanë hyrë në pistën e Aeroportit nga dera e zjarrfikëseve dhe më pas kanë grabitur punonjësit e kompanisë private, e cila po transportonte paratë. Nga ndjekja e policisë ka patur shkëmbim zjarri dhe ku është vrarë njëri prej grabitësve.

Ndërkohë mësohet se kompania private e cila bënte shoqërimin e parave të një banke të nivelit të dytë drejt avionit, është “Nazeri 2000”.

Ndryshe, tre vjet me parë po në Aeroportin e Rinasit, ndodhi një tjetër vjedhje e bujshme. 3 milionë euro u grabitën nga persona të armatosur, ndërsa paratë shoqëroheshin sërish nga e njëjta kompani “Nazeri 200”, në bashkëpunim me kompaninë “Jaguar”.

Informacion paraprak i policisë:

Pak minuta më parë, pranë aeroportit ndërkombëtar “Nënë Tereza”, në Rinas, dyshohet se disa persona ende të paidentifikuar, me maska dhe armë pasi kanë thyer derën e rrethimit që përdoret nga shërbimet zjarrfikëse, kanë grabitur një sasi lekësh në pistën e avionit dhe janë larguar.

Në ndjekje të tyre janë vënë forcat e FNSH dhe ato të Policisë Kufitare të Rinasit.

Gjatë ndjekjes në një rrugë dytësore, autorët kanë shkëmbyer zjarr me Policinë, e gjatë këtij shkëmbimi ka humbur jetën njëri prej autorëve të grabitjes. Policia ka gjetur ndërkohë dhe bllokuar një mjet fugon.

Forca speciale policore si RENEA e FNSH, të ndihmuara nga një  helikopter janë ende në ndjekje të autorëve të grabitjes.

Të angazhuara në operacionin e gjerë janë edhe forca nga Policia e Tiranës, Lezhës, Dibrës e Durrësit.