Ushtria “ruan” Rinasin/ Edi Rama është rehat: Balta e opozitës na shton jetën…

Ndonëse vazhdon debati mbi arsyet e përdorimit të Forcave të Armatosura për sigurinë e Aeroportit në Rinas dhe shkeljen e Kushtetutës, si dhe rrezikun nga Junta e Edi Ramës, Kryeministri sot ishte rehat në seancën plenare të Parlamentit të Shqipërisë.

I ngazëllyer nga suksesi në krijimin e “Opozitës së Edi Ramës”, Kryeministri nga foltorja kishte mesazh edhe për opozitën që ka dorëzuar mandatin, duke e bërë të qartë se futet apo jo opozita, detyra e tijë është të fitojë zgjedhjet dhe “të vazhdojë një beteje të madhe aspak të lehtë, e të përballem me të metat dhe gabimet tona e të përmirësohemi cdo ditë për të qenë cdo ditë e më të vlefshëm për njerëzit”.

E meqë tejkaloi Enver Hoxhaën iu kthye stilit të Leninit:

“Mbi ne balta e tyre na shton jetën, na forcon dhe na e zgjat kohën e qëndrimit në krye të detyrës, se shumica e shqiptarëve jo vetëm nuk janë të gatshëm ti hanë ato broçkulla, por revoltohen nga ato dhe pavarësisht të gjitha arsyeve për të pasur pakënaqësi, kritikë, mërzi e më shumë e më shumë kërkesë ndaj nesh, e ka shumë të qartë që ka vetëm një forcë që e con vendin përpara, PS.”

Por Edi Rama nuk e fshehu kënaqësin që opozita ka ikur nga Parlamenti:

Ata janë në të drejtën e tyre të ikin, të mos marrin pjesë në zgjedhje, detyra jonë është të mos pengojmë askënd, por jo të bindim të gjithë të marrin pjesë në zgjedhje, detyra që nuk i kemi nuk kemi pse ti marrim përsipër, futen ato, apo jo nuk është detyra jonë, detyra jonë është të fitojmë zgjedhjet dhe të vazhdojmë një beteje të madhe aspak të lehtë, e të përballem me të metat dhe gabimet tona e të përmirësohemi cdo ditë për të qenë cdo ditë e më të vlefshëm për njerëzit.”

Madje Kryeministri shiti edhe zemërgjerësi nga foltorja e Parlamentit:

“Mundësitë për dialog i kemi diskutuar këtu, ata kanë një karrige vëzhguesi në Komisionin për reformën zgjedhore dhe kanë status të veçantë se mund të vendosin edhe veto për gjëra që nuk janë dakord, se ne nuk duam që ata të asgjësohen, duam ti mundim në 2021 me rregulla të përcaktuara e dakordësuara bashkërisht.”

Në fund, pasi u mor me politikën kriminale të Partisë Socialiste dhe talljen me opozitën, konfirmoi se vazhdon të mendoj të qeverisë deri në vitin 2021 ndërsa kritikoi edhe paraqitjet e liderit opozita në rrjetet sociale:

“Deri në 2021 janë kohë të përgatiten të përmirësojne edhe selfiet nga vetura dhe në momentin e përballjes elektorale të shikojnë se çfarë mendon populli shqiptar.”

Çelja e negociatave, Rama sulmon opozitën

Për procesin e çeljes së negociatave, Kryeministri Edi Rama, ka përgjigje ende pa e marrë përgjigjen negative: Fajin e ka Opozita!

Pra, nga foltorja e Parlamentit u mundua ti bindë të pranishmit në seancë plenare dhe jo vetëm, se Shqipëria i ka plotësuar të gjitha detyra për të nisjen e negociatave për anëtarësim në BE, por në Shqipëri, sipas tij, janë disa forca politike që janë rreshtuar qartë kundër hapjes së negociatave:

“Shqipëria i ka plotësuar të gjitha detyrat për të çelur negociatat për në BE. Është shumë e rëndësishme për të gjithë që të kuptohet se çelja e negociatave është një vendim që merret nga Këshilli Europian, bazuar në rekomandimin e komisionit, por edhe si rezultat i dinamikave të brendshme në vendet anëtare.

Nëse raporti ndërtohet mbi kritere ekskluzivisht teknike, duke konfirmuar detyrat për çeljen e negociatave, vendimmarrja ne KE është rezultat i debatit të brendshëm, e ku subjektiviteti politik i vendeve ka rolin e vet, te ky subjektivitet duhet të jemi shumë të qartë që ndikimi ynë është relativ dhe në kushtet kur në Shqipëri ka forca që janë qartësisht të rreshtuara në funksion të integrimit dhe çeljes së negociatave, dhe kam parasysh të gjithë ata që janë të pranishëm në këtë Kuvend që përfaqësojnë atë pjesë dërrmuese të opinionit publik dhe shkojnë në vazhdën e një tradite .

Nga brenda vendit, u jepet forcave kundër zgjerimit e nuk e mirëpresin çeljen e negociatave një ushqim kundër interesave të këtij vendi, kjo është shumë e thjeshtë dhe lehtësisht e kuptueshme nga kushdo, nuk ka asnjë justifikim për eksportimin  dhe nxitjen e konflikteve të brendshme në funksion të kësaj vendimmarrje dhe krijimit të aleancave me forca që janë kundër zgjerimit.

Nga pikëpamja e unitetit politik jemi sot më pas se ç’kemi qenë për vite e vite të tëra në të shkuarën, ku pavarësisht sherreve që e kanë shoqëruar zhvillimin demokratik të vendit, forcat politike kanë qenë gjithmonë në funksion të këtij objektivi të palëvizshëm,” tha Edi Rama