Presidenti Trump: Hetimet e Muellerit, përpjekje për grushtshtet!

Presidenti i Shteteve të Bashkuara, Donald Trump, tha se ka biseduar me Prokurorin e Përgjithshëm i SHBA, William Barr, për të kërkuar origjinën e hetimeve kundër tij për bashkëpunim të dyshuar me Rusinë.

Presidenti Trump i përshkroi hetimet e këshilltarit të posaçëm, Robert Mueller, si përpjekje për grushtshtet.

Raporti i Muellerit – pjesë të të cilit janë publikuar muajin e kaluar – nuk ka konstatuar se fushata e Donald Trump ka bërë konspiracion me Qeverinë ruse gjatë zgjedhjeve presidenciale në SHBA më 2016.

“Hetimet kanë qenë përpjekje për grushtshtet. Kanë qenë një tentativë për rrëzimin e presidentit,” tha Presidenti Trump i cili këto hetime vazhdimimisht i ka cilësuar kundër tij si gjueti shtrigash.

Në një dëshmi para Senatit amerikan, më 10 prill, Prokurori i Përgjithshëm tha se mendon se Agjencitë e zbulimit në SHBA kanë spiunuar fushatën e Donald Trump, më 2016.

Barr nuk ofroi ndonjë dëshmi për të mbështetur pretendimet e tij, ndërsa më vonë tha se nuk është i sigurt se ka ndodhur ndonjë keqbërje.

Barr nuk e ka publikuar ende raportin e Muellerit prej gati 400 faqesh, por vetëm një përmbledhje të tij prej katër faqesh.

Demokratët kanë thënë se përmbledhja nuk është e mjaftueshme dhe kanë shprehur shqetësim se Barr, i cili është emëruar nga Trump, po përpiqet të fshehë gjetjet negative për presidentin.

Prokurori i Përgjithshëm i SHBA, William Barr tha se raporti i plotë i Muellerit, me disa redaktime, do të paraqitet në Kongres javën e ardhshme.