Rikthimi i vizave/ Reagimi, Ambasadori i BE: Qeveria shqiptare të…

Një ditë pasi Parlmenti i Holandës votoi për rikthimin e vizave me Shqipërinë ndërkohë pritet vendimi i Brukselit zyrtar, Ambasadori i BE-së në Tiranë, Luigi Soreca, i bëri thirrje qeverisë shqiptare dhe asaj të Holandës, të vijojnë bashkëpunimin.

Në një deklaratë për mediat, ai ka theksuar se për momentin asgjë nuk ka ndryshuar dhe shqiptarët vijojnë të lëvizin të lirë në Shengen, por i ka bërë thirrje qeverisë shqiptare dhe asaj të Holandës, të vijojnë bashkëpunimin.

“Ne e ftojmë si qeverinë shqiptare dhe holandeze të vijojnë bashkëpunimin në këto fusha kaq të rëndësishme si migracioni i parregullt dhe lufta kundër krimit të organizuar.”

Dhe derisa Edi Rama mohon gjithçka që është bërë nga qeveria demokratike, Ambasadori i BE në Tiranë, sqaron se udhëtimi pa viza ishte një arritje fantastike për Shqipërinë dhe qytetarët pas një progresi shumë të rëndësishëm:

“Udhëtimi pa viza është një arritje fantastike për Shqipërinë dhe qytetarët që do të thotë se ka pasur një progres shumë të rëndësishëm dhe është për të gjithë qytetarët që prej vitit 2010. Ju e dini besoj që unë kam qenë në krye të këtij procesi që prej vitit 2010 dhe jam i bindur se autoritetet shqiptare do të marrin të gjitha masat që të ruhet kjo arritje fantastike që është bërë deri tashmë.”

Ambasadori i BE-së në Tiranë, Luigi Soreca, ka sqaruar se për momentin vijon udhëtimi pa viza në vendet e zonës Shengen.

Ndryshe, dje Parlamenti i Holandës ka votuar për rikthimin e vizave për Shqipërinë dhe aryse madhore ishte kriminaliteti i shtuar sepse Shqipëria me këtë shtet nuk ka pasur probleme me migrimin ose shkeljen e rregullave të lëvizjes në Zonën Schengen.