Dëbimi i gylenistëve/ Presidenti Thaçi merr në pyetje Komisionin Hetimor!
Ndonëse ishte paraqitur për tu marr në pyetje, Presidenti Hashim Thaçi mori në pyetje Komisionin Hetimor pranë Parlamentit të Kosovës për dëbimin e 6 shtetasve turq nga Kosova me 29 mars 2018.
Presidenti Thaçi kërkoi që intervistomi të bëhet me praninë e mediave ndërsa kërkoi të verifikohet prezenca e të pranishmëve, duke kërkuar që deputetët të prezantohen me emra dhe mbiemra. Më pas kërkoi të dijë se kush është eksperti që e ka hartuar Draft-Raportin.
Presidenti refuzoi të vazhdojë mbledhja me marrjen e tij në pyetje pa marrë përgjigje, raporton KTV duke cituar Thaçin, i cili tha se këtë ia garanton pozita e tij e presidentit, si dhe pozita e komandantit Suprem të FSK-së:
“Unë respektoj çdo deputetë, ka qenë unanimitet që të krijohet ky Komision. E vlerësoj lartë interesin kombëtar nga secili prej jush. Kam të drejtë ta kontestojë ekspertin, kush është ai?”
Ndërkaq, Hajdar Beqa nga PDK, tha se eksperti është propozuar nga Xhelal Sveçla.
“Nuk e kemi ditë çka punon, a punon për ndonjë Agjenci. Veç e dimë që ka punuar te Avokati i Popullit”, tha ai.
Në këtë situatë, deputeti Frashër Krasniqi tha se presidenti paska shkuar në Komision për të bërë pyetje e jo për t’u përgjigjur.
“Presidenti paska ardhur me bë pyetje dhe jo me dhanë përgjigje. A ju ka kontaktuar Presidenti i Turqisë, Erdogan që të dëboni 6 shtetasit turq?”, pyeti ai.
Por Pesidenti vazhdoi të mos përgjigjet, ai kërkoi sërish të dihen detajet e angazhimit të ekspertit.
Deputeti Anton Quni tha se Presidenti Thaçi s’është i gatshëm për të dhënë informata.
“Puna jonë nuk ka qenë ilegale. Këto tema i kemi pasur në njohuri. Keni mujt me i ngrit këto çështje, edhe sa i përket angazhimit të ekspertit. Këto çështje është dashur të ngriten nga stafi juaj. Keni pasur mjaft kohë. Z.President krejt kjo dramë që po zhvillohet po tregon që ju nuk jeni të gatshëm me dhënë informata.”
Por Thaçi këmbënguli të dijë nëse eksperti i angazhuar ndërkombëtar e ka aprovimin e ndonjë zyre ligjore:
“Eksperti a lejohet për tu angazhuar, përveç vendimit që e keni marrë si komision. Në cilin dokument lejohet angazhimi kur bëhet fjalë me sigurinë kombëtare. Tash po më thoni i preferuari i z.Kurteshi. Si mund të jenë një këshilltar i një subjekti politik i angazhuar një ekspert, çfarë raporti kredibël mund të jetë ai?”
Dhe derisa po merrej në pyetje për shtetasit turq, por duke mos dhënë asnjë përgjigje, dhe po vazhdonte diskutimi për çështjen e angazhimit të ekspertit për hartimin e Draft-Raportit, Presidenti Hashim Thaçi i tha deputetit të Lëvizjes Vetëvendosje, Sami Kurteshi, “unë të dua” madje disa herë gjatë intervistimit, Thaçi i tha Kurteshit edhe “je djalë i mirë”.
Sami Kurteshi i tha se “i dimë lojërat e njëri-tjetrit” por Anton Quni veprimet e Thaçit i quajti dramë. Më pas, Presidenti Hashim Thaçi tha se ka një telefonatë dhe do të marrë pjesë në një Akademi dhe do të kthehet në orën 15:00.
