Takimi me Metën/ Aleatët e PD: Ja çfarë kërkuam, presim që Presidenti…

Aleatët e Partisë Demokratike zhvilluan një takim me Presidentin e Republikës, Ilir Meta me qëllim të gjetjes së një konsensusi të gjerë me për zgjidhjen e krizës politike.

Pas takimit, kryetari i Partisë Republikane, Fatmir Mediu u shpreh se Presidenti kishte vlerësuar kërkesën e tyre dhe pritet marrë veprimet e veta pas diskutimit me palët tjera politike.

“Në emër të të gjtihë kolegëve dua të falenderoj presidentin për një diskutim të haur në raport me kërkesën tonë. Ndajmë të njëjtin shqetësim që situata është problematike, dhe duhet të pengojmë mos të shkojmë në një konflikt.

Presidenti ka bërë gjithcka që reforma në drejtësi të jetë në përputhje me garantimin e pushtetit të pavarur të gjyqësorit, për të mos arritur në këtë ditë që nuk kemi Gjykatë Kushtetuese dhe të Lartë. Presidenti ka marrë iniciativa dhe do të vazhdojë në këtë rrugë që të jenë zgjedhje pluraliste dhe sa më përfshirëse.

Presidenti vlerësoi kërkesën e partive tona, në vlerësim të kërkesës tonë do të marrë qëndrimet e veta në diskutim edhe me palët e tjera. Presidenti është në të njëjtën valë shqetësimi si gjithë qytetarët shqiptarë, por ka edhe angazhimin që palët të gjejnë zgjidhje për të mos shkuar në dëm të interesave të vendit”, tha Mediu.

Ndryshe, takimi me Presidentin u kërkua nga kryetarët e partive të Qendrës së djathtë, në kulmin e krizës politike dhe me qëllim të inicimit të një tryeze nga Presidenti Meta, në kërkim të një zgjidhje me të gjithë aktorët politikë.

Ndërkohë pas takimit, Presidenca përmes një njoftimi ka zbardhur detajet duke shprehur shqetësimin e thellë për krizën serioze kushtetuese, institucionale dhe të përfaqësimit ku ka hyrë vendi :

Njoftimi i plote:

Presidenti i Republikës, Sh.T.Z. Ilir Meta priti sot me kërkesë të tyre kryetarët e partive politike të Grupimit të Qendrës së Djathtë, kryetarin e Partisë Republikane, z.Fatmir Mediu, kryetarin e Partisë Agrare Ambientaliste, z.Agron Duka, kryetarin e Partisë Bashkimi për të Drejtat e Njeriut, z.Vangjel Dule, kryetarin e Partisë Demokristiane, z.Nard Ndoka dhe dëgjoi me vëmendje çështjet e ngritura gjatë takimit.

Presidenti Meta shprehu shqetësimin e thellë për krizën serioze kushtetuese, institucionale dhe të përfaqësimit ku ka hyrë vendi.

Kreu i Shtetit theksoi se më herët kishte paralajmëruar domosdoshmërinë e vendosjes urgjente të dialogut për shmangien e përshkallëzimit të konfliktit.

Presidenti Meta nënvizoi se ka bërë çdo përpjekje për të nxitur zbatimin e reformës në drejtësi brenda afateve dhe parimeve kushtetuese që do të garantonin kontrollin e balancën e sistemit në një shtet funksional të së drejtës.

Nëse kjo do të kishte ndodhur, kriza aktuale politike nuk do të kishte marrë këto përmasa.

Kreu i Shtetit shprehu shqetësimin se mosregjistrimi i të gjitha partive opozitare të legjislaturës së fundit parlamentare rrezikon jo vetëm standardet e zgjedhjeve, por edhe pluralizmin politik në vend.

Presidenti Meta thekson se nuk është asnjëherë vonë për të reflektuar dhe për të gjetur zgjidhje që do të rivendosnin normalitetin kushtetues, institucional dhe demokratik të vendit.

Presidenti Meta nxit dialogun dhe zërat e arsyeshëm, për dekurajimin e përshkallëzimit të mëtejshëm të krizës.

Kreu i Shtetit do të vazhdojë kontributin e Tij, me të gjitha format e mundësitë për të kërkuar reflektimin e të gjithëve, me qëllim garantimin, jo vetëm të bashkëjetesës demokratike, por edhe ecurinë e suksesshme dhe të besueshme të reformave të lidhura me integrimin europian.