Gënjeshtari i mahnitur!
nga Agim Popoci
Samiti i Berlinit përfundoi dhe me te edhe gënjeshtrat e kryeministri Edi Rama, të artikuluara që nga Qershori i vitit të kaluar mbi çeljen e negociatave.
Por Kryeministri nuk doli të kërkoi falje pse kishte gënjyer ose në rastin më të mirë, pse kishte gënjyer sepse e kishin gënjyer, por sulmoi! Ashtu siç bëri në vitin 2016, 2017, 2018, bënë dhe sot. Pra, fajin ia kanë kazanët ose më saktë është i mahnitur nga kazanët dhe ligësitë e të dëshpruarëve!
Pse gjithë ky agresivitet i njeriut që po qeverisë me mashtrime dhe pse i akuzon dhe kazanët po i rrinë pronto; Apo ishte në dijeni për këtë përgjigje dhe i shpërbleu me ca miliona euro ata që i shërbyen, dhe, tashmë vërtetë janë kazanë!
Po, le të nisemi nga viti 2016, kur skenari ishte i njëjtë ashtu si edhe akuzat! Pra, nuk po flasim për gënjeshtra nga periudha e Bizantit. Shtatori i vitit 2016, një ceremoni e zakonshme, Ambasadorja e BE në Tiranë, Romana Vlahutin, i dorëzon Kryeministrit Edi, Rama Progres-Raportin për Shqipërinë. Këto arritje, thotë ajo, e bindën Komisionin Europian që t’i rekomandojë Shqipërisë çeljen e negociatave. Kaq iu deshtë Kryeministrit Edi Rama të filloi me broçkullat e tij pa fund duke harruar se shumë shpejtë vjen vendimi i Këshillit të BE dhe do ta ulë me këmbë në tokë, por ai nuk ndaloi tha se kjo arritje nuk u ndal as nga, siç e quajti ai, kazani i broçkullave.
“Kazani broçkullave që zien përditë në mjedisin politiko-mediatik, ziente për kushtet që do i viheshin Shqipërisë, madje deri dhe kanabisi do ishte kusht për çeljen e negociatave. Por ata që për 3 vite rresht refuzuan çeljen e negociatave, por dy ditë më parë dolën hapur kundër hapjes së negociatave. Shqipëria sot e mori dhe pa kushte çeljen e negociatave dhe e vetmja pikë ku rekomandohet është që në tryezën për reformën në drejtësisë të zbatohet veçanërisht ligji për Vettingun”
Çelja pa kushte e negociatave vërtetë rezultoi broçkull kazani por ishte në pronësi të kryeministrit Edi Rama. Vërtetë nuk gjendej në vendimin e Këshillit asgjëkundi kanabisi ama negociatat nuk çelën. Dhe e keqja nuk përfundoi këtu!
Viti 2017, e njëjta skenë, po ai regjisor dhe po ato akuza. Pas dhënies së rekomandimit për çeljen e negociatave të Shqipërisë me BE-në, Kryeministri Edi Rama e cilësoi një ditë të madhe për Shqipërinë, ndërsa shtoi se reformat e thella dhe të pareshtura po japin fryte. Romana e shkretë bëri punën e saj, i dha zyrtarisht Raportin e Komisionit Europian e Edi Rama tha se rekomandimi është dhënë pa asnjë rezervë dhe sulmoi mediat që u morën me frymëmarrjen e tij në deklaratën e bërë pas protestës në Rrugën e Kombit. “Jam i emocionuar dhe ata që merren me frymëmarrjen mbase e ndjejnë, por jam edhe shumë krenar, sepse ja dolëm këtij provimi të vështirë.” Por nuk e përfundoi këtu, tha dhe ato që do ti bien kokës:
“Europa nuk bën dhurata dhe Brukseli është një makineri e pamëshirshme që sheh dhe njeh vetëm meritat. Rekomandimi është njohja e meriatave tona në fushën e reformave dhe me luftë të vërtetë kundër armiqëve të shoqërisë dhe shtetit, krimit dhe korrupsionit!”
Vjen dhe viti i gënjeshtrës së madhe, 2018! Përveç Edi Ramës dhe Ditmir Bushatit nuk kishte njeri në këtë tokë që e imagjinonte çeljen e negociatave me BE-në sepse përveç krimit dhe korrupsionit shqiptar ishte po ky Presidenti i Francës, Emmanuel Macron që kundërshtonte zgjerimin. Po ç’ti bëshë shpikësit të broçkullave.
Kur del nga goja e një byrokrati komunist si Komisioneri për Zgjerimin, Johannes Hahn, sikur edhe ka kuptim por kur shqiptarëve u thotë Kryeministri i tyre, pa i lëviz qerpiku, se morëm “për herë të parë datë për hapjen e negociatave”, dhe kjo do të ndodhë një vit më pas, situata bëhet shqetësuese, përtej broçkullës dhe kazanit.
“Pas 72 orësh mes dallgëve të brendshme të BE Shqipëria i’a doli të marrë datën për hyrjen në portin e Europës së Bashkuar. Rezultatet e reformave tona bënë që dhe më skeptikët të njohin meritën e Shqipërisë e të Maqedonisë. Një betejë tejet e vështirë u fitua lufta vijon.”
Pra, në vitin 2018, Këshilli i BE i jep datën për çeljen e negociatave në vitin 2019! Një idiotizëm që shkaktoi furtunë në mes të rilindasve që kritikonin ata jorilindas që respektonin inteligjencën e tyre, dhe nuk e kapërdinin dot një mashtrim kaq të trashë. Madje as atëherë kur u mundua ti bindë Komisioneri për Zgjerimin me broçkullat ramiste mbi çështjen e hapjes së negociatave në qershorin e vitit 2019, lumturinë e Hahnit, udhërrëfyesin e çeljes së negociatave dhe marrëzira të ngjashme që as kazanët e Edi Ramës nuk i nxjerrin dot nga goja.
Për të ardhur në fund te Samiti i Berlinit, ku për taksiratin e Edi Ramës dhe reformave të tij mbresëlënëse që vetëm opozita dhe kazanët nuk i shohin, ishte prezent Presidenti Macron.
Emmanuel Macron i tha qartë, jo zgjerimit! Kjo nuk e mahniti Edi Ramën por reagimi i qytetarëve, aty ku ai është kryeministër dhe vazhdon ti gënjejë për të tretin vit me radhë për të njëjtën çështje, çeljen e negociatave.
“I mahnitur nga kazanët e nga ligësitë e të dëshpëruarve që duan me patjetër dështimin e Shqipërisë,” tha sot Edi Rama kur nuk i bënte më derman asnjë deklaratë e Komisionerit Johannes Hahn, meqë të dy e mashtruan e popullin shqiptar.
Sot kur gënjeshtari mahnitet nga reagimet shqiptare për dështimin e çeljes së negociatave, por ashtu siç e tha me gojën e vetë në vitin 2017, Europa nuk bën dhurata dhe Brukseli është një makineri e pamëshirshme që sheh dhe njeh vetëm meritat, si çelja e negociatave, ashtu dhe Europa dhe Brukseli, nuk kanë punë me kazanët dhe ligësitë.
Nëse kazanët dhe ligësitë i duhen Edi Ramës për gallatë, mund të vazhdoj me to; Por, për çeljen e negociatave duhet një kryeministër normal, që nuk ka lidhje me drogën, krimin dhe korrupsionin, me kazanët dhe ligësitë, e që në rastin shqiptar, fatkeqësisht situata gjithnjë e më shumë po bëhet e pashpresë…
