Liria e Shtypit pëson “vdekje klinike”, shkaku: Filloi Ilir Meta të kujdeset për të!

Sot në Ditën e saj Ndërkombëtare, Liria e Shtypit në Shqipëri pësoi “vdekje klinike”. Jo se u betua kryeministri se nuk do të ofendoj më gazetarët ose padronët e tyre që janë sejmenët e përbetuar të Edi Ramës, por se për Lirinë  e Shtypit ka filluar të kujdeset edhe Ilir Meta, që sot është President.

Jo, jo ti blejë mediat, këtë ka kohë që e bënë, por të kujdeset për Lirinë e Shtypit, për gjendjen e së cilës është njëri ndër bashkëfajtorët kryesor që në kohën kur ai ishte Kryeministër:

“Dita Ndërkombëtare e Lirisë së Shtypit e gjen sot Shqipërinë të renditur ndër vendet me liri të pjesshme të medias. Shqetësimet e thella të ngritura në raportet e fundit të “Freedom House” dhe “Reporterëve pa kufij”, për fatin e keq, vijojnë të hasin në vesh të shurdhët. Shtypi ynë sot, edhe sipas këtyre organizatave, është më pak i lirë dhe i pavarur, mediat goditen nga retorika agresive dhe kërcënuese, rastet e dhunës ndaj gazetarëve janë shpeshtuar dhe tentativat për të përdorur fondet publike për të kontrolluar lirinë e shprehjes janë alarmante. Kjo situatë duhet të marrë fund!” thekson Ilir Meta përmes rrjetit social Facebook, por nëse i referohemi trajtimit të mediave opozitare në kohën kur ai ishte Kryeministër, kohë kur kishte media të tilla, nuk kishte retorikë por vetëm dhunë.

“Media e lirë luan rol kyç për të garantuar llogaridhënien dhe mirëqeverisjen. Praktikat e mohimit të së drejtës së gazetarëve për të ndjekur drejtpërdrejt veprimtarinë e autoriteteve publike duhet të ndalen. Sepse çdo goditje ndaj institucionit të medias, është sulm ndaj demokracisë,” tha sot Ilir Meta, dhe të gjitha ato media që e njohën Metën kryeministër, dhe trajtimin e tyre, me të lexuar këto radhë, sot u asfiksuan pa vazhduar leximin e postimit me Urimin e tij.

Duke pasur parasysh të kaluarën e shtypit shqiptar, sot, Urimi më i mirë për të gjithë gazetëarët është:

“Urojmë t’a ushtroni profesionin e gazetarit, jo si në kohën  e Ilir Metës kryeministër!”