Haradinaj: Pozicioni i Washingtonit dhe Brukselit, Berlinit dhe Parisit, është i gabuar …

“Është gabim pozicioni i Washingtonit dhe evropianëve, Berlinit dhe Parisit, t’ia pranojnë kushtin Serbisë, heqjen e  tarifës, për të vazhduar dialogun,” tha kryeministri i Kosovës, Ramush Haradinaj, gjatë pjesëmarrjes së tij në tryezën e diskutimit me shoqërinë civile me temë “Dialogu Kosovë – Serbi pas takimit të Berlinit”, të organizuar nga KDI, duke shtuar se është për zgjidhje, janë për t’u marrë vesh, për një marrëveshje të paqes, por së pari duhet të dihet e vërteta, duke numëruar nja varg çështjesh dhe pengesash nga ana e Serbisë, në mos realizimin e marrëveshjeve të arritura.

Në tryezë është diskutuar mbi sfidat e dialogut, mbi të ardhmen e dialogut pas Samitit të Berlinit, mbi grupin negociator apo delegacionin shtetëror, përbërjen e tij, opozitën, rolin e ShBA-së në këtë proces si dhe për takimin e Francës i cili do të jetë pas Samitit të Berlinit.

Kryeministri Haradinaj, tha se nuk bëhet fjalë vetëm për fatin e Kosovës, të partive politike, sepse s’mund të ndahet Kosova vetëm në Kosovën e partive politike, ose të Kosovës së partive politike të Qeverisë në pushtet, të koalicionit qeverisë, por është një Kosovë, edhe atyre që janë në pushtet, edhe partive që janë në opozitë, por edhe atyre që s’janë në partitë politike, të organizimeve qytetare, si rasti i KDI-së.

“Kosova është shtëpi e të gjithëve dhe është mirë që debati dhe temat të kalojnë nganjëherë në tavolinën tuaj dhe jo vetëm në tonën, si, të partive ose vetëm të institucioneve”, tha kryeministri Haradinaj.

Kryeministri Haradinaj, gjatë fjalës së tij në tryezën e diskutimit me shoqërinë civile, tha se Kosova është Evropë, si gjeografi, si popull, kulturë, vlerë, si identitet.

“Unë jam shqiptar, por shteti im tash është Kosova, por edhe një serb i Kosovës, shtet e ka Kosovën”, tha kryeministri Haradinaj, duke shtuar se e do shumë Shqipërinë, e ka si shtëpinë e tij, por prapë shtet ka Kosovën, duke menduar se kjo është me rëndësi të kuptohet drejtë prej të gjithëve që jetojnë në Kosovë, sidomos prej serbëve të Kosovës.

Kryeministri Haradinaj tha se një serb mund ta ketë shtëpi të dytë Serbinë, por kur ka lindur në Kosovë, ai ka shtet Kosovën dhe kjo kështu do të vazhdojë dhe mbetet dhe është me rëndësi, që mbi atë bazë, të ruhet një komunikim, që një shtet kanë të gjithë që jetojnë në Kosovë, me një flamur, atë të shtetit të Kosovës.

“Unë nuk e mohoj Kosovën, nëse e dua flamurin kuq e zi. Unë nuk mendoj që një serb e mohon Kosovën, nëse e do edhe flamurin e vet serb”, tha kryeministri Haradinaj.

Kryeministri tha se janë fqinj tanimë, kosovarët dhe serbët, që do të jenë këtu gjithmonë për njëri-tjetrin. “Dy fqinj mund të zgjedhin se a do të jetojnë në telashe apo paqe dhe e vërteta është që e kaluara është telashe, që nënkupton tragjedi, dhimbje, por a ka ndonjë brez që dëshiron ta ndërron këtë, ky është vendim i atyre që udhëheqin popullin në të dyja anët”, tha kryeministri Haradinaj, duke besuar se Kosova është e interesuar për paqe, për të kaluar në ardhmëri, duke mos harruar të kaluarën.

Duke theksuar se vetë pjesëmarrja e Kosovës në dialog, ka vërtetuar se Kosova dëshiron të jetojë në paqe, dha një shembull, si atë, se si kryeministër i vendit, nuk mund të rrijë dot pa shkuar në Krushë, kur është përvjetori i masakrës, sepse po që se nuk do të shkonte, nënat, familjarët e mallkojnë dhe, nga këta përvjetorë, ai shkon në Berlin pa asnjë kusht në dialog, edhe pse nga familjarët e atyre që kanë humbur të dashurit e tyre, kanë kushte se si duhet të flasin me Serbinë.

“Është gabim pozicioni, edhe i Uashingtonit, edhe i evropianëve, edhe i Berlinit, edhe i Parisit, t’ia pranojnë kushtin Serbisë, heqjen e  tarifës, për të vazhduar dialogun”, tha kryeministri Haradinaj, duke potencuar faktin se si kryetar i Qeverisë, i cili vjen prej Mejes, më 27 prill ka qenë përvjetori i masakrës, ai më 29 prill ka shkuar në  Berlin dhe është ulur përballë Vuçiqit për dialog dhe për këtë, kryeministri Haradinaj shtoi se, nëse nuk vendoset një korrektësi në parime, është vështirë të arrihet te rezultati.

Kryeministri Haradinaj tha se janë për zgjidhje, janë për t’u marrë vesh, për një marrëveshje të paqes, por së pari duhet të dihet e vërteta, duke numëruar nja varg çështjesh dhe pengesash nga ana e Serbisë, në mos realizimin e marrëveshjeve të arritura, kryeministri theksoi se ka 20 vjet që Kosova humb rreth 50 milionë euro në vit në energji, që është rreth 1 miliard euro deri më tani për shkak të Serbisë, humben edhe miliona euro për shkak të hapësirës së lartë dhe të ulët, BE-ja humb mjete financiare sepse nuk po zbatohet IBM dhe lista është e gjatë.

Është e pakuptimtë që Kosova me marr masa të reja pas Berlinit dhe para Parisit dhe nuk do të ndërmarrim masa të reja, por e kemi problem sjelljen e Beogradit zyrtar i cili i ndalon i keqtrajton zyrtarët e Qeverisë së Kosovës të përkatësisë serbe dhe kjo duhet të zgjidhet nuk duhet të vazhdojë më kështu në pafundësi.

“Koha na ka shtuar të dy palëve, 20 vjet kanë kaluar që nga përfundimi i luftës në Kosovë dhe ne nuk kemi interes me hap Kosovën e 17 shkurtit, se këtë Kosovë të 17 shkurtit  e ka mbyllur Gjykata Ndërkombëtare e Drejtësisë. Ju siguroj se kushdo që ju thotë se përmes lëvizjes së kufijve ose rikorrigjimit të kufijve arrihet paqja, nuk arrihet paqja, por arrihet lufta dhe tragjeditë”, tha kryeministri Haradinaj dhe shtoi se ata që dëshirojnë që propozojnë marrëveshje përmes kufijve janë duke e bërë me qëllim me fut Ballkanin në jostabilitet minimum edhe për dy dekada.

Më tej, kryeministri Haradinaj vlerësoi se Marrëveshja Gjithëpërfshirëse që është bërë njëherë në Kosovë ende pa u votuar delegacioni, është një bazë për një marrëveshje me Serbinë, Platforma e votuar në Parlament dhe delegacioni janë poashtu mundësi për të ecur përpara, ndërsa në Paris kam kërkuar, dhe ka dakordim që të shkojnë liderët e institucioneve por edhe bashkë kryesuesit e delegacionit në këtë rast z.Limaj dhe z.Ahmeti.

Ndërsa, Ambasadori i Zvicrës në Kosovë, Jean – Hubert Lebet, tha se Samiti i Berlinit ka konfirmuar rëndësinë e palëve që të arrijnë një marrëveshje gjithëpërfshirëse dhe ligjore me qëllim që të arrihet normalizimi i plotë i marrëdhënieve ndërmjet Kosovës dhe Serbisë, do të mundësonte realizimin e perspektivës së BE-së për të dy vendet si dhe do të kontribuonte në stabilitetin rajonal. Më tej ambasadori Lebet tha se Zvicra mbështet fuqimisht këtë qasje dhe mirëpret iniciativën e Gjermanisë dhe Francës.

Drejtori i KDI-së, Ismet Kryeziu, pasi falënderoi kryeministrin dhe të pranishmit për prezencë tha se sot janë mbledhur për të diskutuar sfidat e dialogut, mbi të ardhmen e dialogut pas Samitit të Berlinit, mbi grupin negociator apo delegacionin shtetëror, përbërjen e tij, opozitën, rolin e ShBA-ve në këtë proces si dhe për takimin e Francës i cili do të jetë pas Samitit të Berlinit.