Edi Rama e quan gënjeshtar, përgjigjet Haradinaj…

Kryeministri i Shqipërisë e quajti gënjeshtar por Kryeministri i Kosovës, Ramush Haradinaj duke iu përgjigjur këtij ofendimi tha se Edi Ramën e ka “vëlla” ashtu sikurse i ka të gjithë shqiptarët tjerë.

“Kryeministri i Shqipërisë është institucion, për të cilin unë kam shumë respekt. Kryeministri Edi Rama është vëlla i imi ashtu sikurse janë krejt shqiptarët kudo që janë. Të vërtetën do ta them pa marrë parasysh kujt i pëlqen ose jo. Unë kam thënë të vërtetën për samitin e Berlinit”, tha ai,
pas homazheve që bëri tek varri i heroit Ilir Konushevci dhe i Hazir Malajt.

I pyetur nga gazetarët për deklaratat e përfaqësueses së lartë të BE-së, Federica Mogherini, ku ajo ka përjashtuar veten nga çdo plan me presidentët Vuçiq, Thaçi dhe Rama për ndarjen e Kosovës, Haradinaj nuk preferoi të përgjigjet për këtë çështje por shtoi se suksesi më i madh i Samitit të Berlinit është kalimi i procesit të dialogut nga shefja Federica Mogherini, në përgjegjësi të kacelares gjermane Angela Merkel dhe presidentit francez Emanuel Macron.

“Pra, procesi i dialogut është larguar prej një adrese, e cila ka mundur ta befasojë Kosovën me një marrëveshje të keqe. Është shumë me rëndësi që kushdo që ka besuar se duke e ndarë Kosovën arrihet një marrëveshje Kosovë – Serbi, e kanë parë se ai projekt është përmbyllur. Pra, marrja e dialogut prej zonjës Mogherini tek kancelarja Merkel, që ka qëndrim të qartë e të vazhdueshëm kundër lëvizjes me kufij, tani mendoj se mundemi me qenë më të qetë. Duhet të jemi më vigjilentë sepse kuzhinat vazhdojnë me gatu, por nuk kemi më rrezik nga ndarja e Kosovës”, tha në fund Ramush Haradinaj duke saktësuar se duhet të ndryshohet regjimi i kufirit me Shqipërinë.