Atentat në Vlorë, plagoset punonjësi i Bashkisë…

Një person ka mbetur i plagosuar në Vlorë pas të shtënave me armë zjarri në afërsi të kompleksit Oslo, që njihet si lokali i Edison Harizajt.

Ngjarja ka ndodhur rreth orës 11:00 dhe sipas “BW”, i plagosuri është identifikuar si Dajko Cenodema, 58 vjeç, punonjës i bashkisë i cili ndodhet në spital jashtë rrezikut.

Burime nga Policia bënë me dije se ka dyshime që Cenodema është plagosur rastësisht dhe nuk ka qenë objektiv i atentatit.

Po sipas policisë, ngjarja ka të bëjë me vijimin e konflikteve për vrasje të ndodhura pak kohë më parë. Kjo, pasi në vendin ku ndodhi ngjarja qëndrojnë persona të afërt me Edison Harizajn, i vrarë ky në nëntor të vitit 2018, në Durrës.

Mesohet se me breshëri në drejtim të një personi që ndodhej në një lokal në zonën e Lungomares është qëlluar nga një automjet dhe pak minuta pas kësaj ngjarje të rëndë në zonën e Babicës është gjetur një automjet i djegur, por pritet konfirmimi i policisë nëse ka lidhje me autorin e plagosjes dhe ngjarjen në afërsi të kompleksit Oslo.