Parada ushtarake në Serbi/ Ambasadori i SHBA: Turp, parakalon një kriminel!

Ambasadori amerikan në Beograd, Kyle Scott e ka cilësuar turp për Serbinë pasi gjenerali serb i dënuar për krime lufte, Vlladimir Llazareviç, në Ditën e Evropës në Nish ishte në krye të “Regjimentit të Pavdekshëm Srbija” i cili parakaloi në paradën ushtarake.

“Është turp që një kriminel lufte i dënuar, të parakalojë para atyre të cilët po përpiqen t’i nderojnë aleatët të cilët kanë vdekur duke luftuar për drejtësi dhe paqe në Evropë. Dita e Evropës, Vlerat e Evropës,” thekson në reagimin e tij përmes rrjetit social Twitter, Ambasadori amerikan Scott.

Ndryshe, Vlladimir Llazareviç ishte Komandant i korpusit të Prishtinë dhe i Armatës së Tretë gjatë luftës në Kosovë, i dënuar nga Gjykata e Hagës për krime kundër njerëzimit në Kosovë me 14 vjet burg. Ai u lirua në dhjetor 2015 me kusht, pasi i kaloi më shumë se 10 vjet në burgun e Sheveningenit.