30 Qershor/ Kërcënimi,Edi Rama: Kush i afrohet Qendrës së Votimit, djeg veten…

Kryeministri Edi Rama në takim me kandidatët e Partisë Socialiste kishte këshilla edhe për ata që nuk kanë përballë kundërshtarë ndërsa për paralajmërimin se mund të bllokohen zgjedhjen kishte kërcënime.

Përçmoi liderin e opozitës Lulzim Basha si kurrë më parë por tha se është i gatshëm për bisedime. Kujton 23 ditët e grevës së urisë por jo edhe 3 vitet e bllokimit të Këshillit Bashkiak të Fierit kur pengoi integrimin e Shqipërisë në BE. Dhe në fund, se kur do të largohet, nuk e ka të qartë as vetë, ashtu siç nuk e kishte paraardhësi i tij, shoku Enver.

E filloi nga çmenduria e këtyre zgjedhjeve, garë ka rival:

“Në një pjesë të bashkive nuk do të ketë kandidat, por do të ketë fushatë intensive për nga numri i kontakteve me njerëzit dhe ngritjen e kapaciteteve. Kudo që do të kemi kandidatë të opozitës politike. Dhe objektivi ynë nuk do të jetë thjeshtë të fitojmë bashkinë, por të fitojmë sa më shumë kontakte me njerëzit. Kjo do të jetë një betejë me zemrat dhe mendjet e shqiptarëve, me fantazmën e të shkuarës. Opozita është kthyer në fantazmën e të shkuarës, që është kthyer në shëmbëlltyre të asaj hije. Ta zmbrapsim këtë hije njëherë e mirë, dhe do të ngordhë njëherë e përgjithmonë politika e pengmarrës dhe do të garantohet vetëm shteti ligjor. 30 qershori duhet dhe do të behet momenti i ngjitjes së politikës shqiptare në një stad të ri. Momenti i rënies përfundimtare të politikës shqiptare, mund të fitosh duke minuar edhe fushën do marrë fund. 30 vjet janë mjaft për të dhënë boll në 30 qershor,” tha Edi Rama duke mos folur më si kryetar i PS dhe aq më pak si kryeministër por si “shpëtimtari” i Shqipërisë:

“Kemi ardhur në një pikë ku duhet t’i dalim zot Shqipërisë që duam. Kur Shqipëria ka nisur të marrë trajtat e para të një shteti kërcënohet. Jo sot, dje kisha ikur unë nëse nuk do ta shihja katranin me bojë që qeverisi deri dje Shqipërinë. Jo nesër, sot iki unë nëse nuk do kisha mësuar historinë e këtij vendi dje. Hetimet deri në fund, po duhen çuar në burg këdo që kapet me blerje votash.”

Komisionin Hetimor që e kërkonte si opozitë e quan “copë” ndërsa krimin elektoral të dëshmuar me përgjime zyrtare nuk e konsideron fare:

“Kur ishte në pushtet ajo parti na ka lënë të dergjemi 23 ditë në grevë urie në mes të Bulevardit për një copë komisioni hetimor. Pse kemi qenë shumica qeverisëse më e hapur dhe më dorështrirë ndaj opozitës, sepse askush, ndonjëherë se ka imagjinuar atë që bëmë ne në 2017. E bëmë që të mbyllet njëherë e mirë çadra e politikës së çmendur. Siç e shohim nuk funksionoi. Por doli më keq. Filloi shiu, çadrat u shtuan si kërpudha, kërpudhat u shkatërruan dhe filluan bombat mbi kryeministrinë. Këtë gërdi të re e thonë se e bëjnë për të mos u përsëritur ajo e 2017-ës.
Këta në vend se të qëndronin dhe të ndërtonim së bashku mbi atë stad tjetër përsërisin pa pushim që nuk e përsërisim kurrë atë mëkat. Kurrë më marrëveshje me dialog, por pengmarrje e procesit politik me bomba. Ajo marrëveshje nuk funksionon dhe asnjë marrëveshje nuk funksionon sepse PD ka ndërruar qimen por jo zakonin. Lulzim qimja që nuk bëhet dot zakon. Deri kur PD nuk ndërron zakon nuk do ketë asnjë shans për të sfiduar PS. Shpirti i kësaj partie është doktori i gabuar jo kryetari i llakuar,” vazhdoi me akuza fajtor kryesor i prishjes së kësaj Marrëveshje, Edi Rama ku përveç përgjimeve të publikuara nga opozita që dëshmojnë se si mazhoranca blenë votat përmes krimit, së fundi edhe gazeta gjermane “Bild” dëshmoi se kush ishte ai që futi duart në qendrat e votimi.

Por i pari i qeverisë së këtij vendi, sipas Edi Ramës, ka të drejtë ti fus duart por jo edhe ai, vota e të cilit duhet të vlejë për këtë vend, votuesi. E ky I fundit, nëse I aforhet qendrës së votimit me një mendje si Edi Rama, do të djeget:   

“Kushte nuk ka. Kushtetutën e kemi të njëjtë dhe si të tillë na takon ta respektojmë. Kush i afrohet një Qendre Votimi me mendje të keqe djeg veten jo zgjedhjet.”