Kosova nuk i jep leje Gjuriçit për të hyrë në veri

Drejtorit të Zyrës për Kosovën pranë Qeverisë së Serbisë, Marko Gjuriç, i është refuzuar kërkesa për të vizituar Kosovën, më saktësisht komunat veriore të cilat nesër i mbajnë zgjedhjet e jashtëzakonshme.

Lajmin e ka konfirmuar Jetlir Zyberaj, këshilltar i ministrit të Punëve të Jashtme, Behgjet Pacolli.

“Nuk aprovohet kërkesa e tij për vizitë pasi nuk është në përputhje me kriteret e Marrëveshjes së Brukselit,” tha Zyberaj për KTV duke sqaruar se sipas marrëveshjes së Brukselit, tha Zyberaj, për aranzhim të vizitave zyrtare kërkesat duhet të dërgohen gjatë ditëve të javës e Hënë – Premte në orar të punës deri në orën 17:00.

Marko Gjuriç sot në televizionin publik serb, RTS, është ankuar se gjatë vitit të kaluar është përpjekur 18 herë të hyjë në Kosovë, por nuk ia ka dalë.

“Organet e Prishtinës nuk më kanë lënë. Do të provoj përsëri të hyjë në Kosovë,” tha ai.