Thaçi: Pa Marrëveshje Kosovë-Serbi, u hapet rruga elementëve antieuropianë

Presidenti i Kosovës, Hashim Thaçi, ka falënderuar Zv/Presidentin e Atlantic Council, Damon Wilson, gjatë një takimi me një delegacion nga Senati dhe Kongresi Amerikan, për kontributin e vazhdueshëm të këtij Këshilli në Kosovë për forcimin e strukturave të sigurisë.

“Në 20 vjetorin e çlirimit të Kosovës, populli dhe shteti i Kosovës janë mirënjohës përjetësisht për rolin përcaktues të SHBA-së në lirinë dhe pavarësinë e Kosovës,” tha Thaçi gjatë takimit me delegacionin amerikan ku është biseduar edhe për procesin e tranzicionit të Forcës së Sigurisë së Kosovës dhe anëtarësimin e Kosovës, fillimisht në Partneritetin për Paqe, më pas edhe në NATO.

Dialogu Kosovë – Serbi dhe domosdoshmëria e shfrytëzimit të momentit për arritjen e një marrëveshjeje gjithëpërfshirëse dhe ligjërisht obliguese ishte temë e pashmangshme e takimit:

“Mungesa e një marrëveshje ndërmjet Kosovës dhe Serbisë mund të ketë pasoja për sigurinë dhe stabilitetin në rajon dhe i hapë rrugë elementeve antievropiane,” tha Presidenti Thaçi.

Nga ana tjetër, Zv/Presidenti Damon Wilson ka rikonfirmuar angazhimin e Atlantic Council për Kosovën.

Presidenti Thaçi tha se bashkë me SHBA-në do të vazhdojnë angazhimin maksimal për të ruajtur dhe zhvilluar paqen dhe sigurinë në Kosovë dhe rajon.