Pas aksionit të Veri/ KFOR: Njerëzit të jenë të qetë dhe të mos kenë frikë

Komandanti i KFOR-it, gjenerali italian Lorenco D’adario, për shkak të momentit të ndjeshëm politikë i bëri thirrje të gjitha palëve në Kosovë që me qetësi dhe përgjegjësi të zgjidhin kontestet, pa përdorimin e forcës ose dhunës.  

“Njerëzit duhe të jenë të qetë, nuk kanë arsye të kenë frikë nga asgjë,” thekson komunikata zyrtare e KFOR-it si përgjigje për Agjensinë shtetërore serbe të lajmeve Tanjug.

Me rastin e situatës së krijuar në Veri të Kosovës, KFOR-i bënë me dije se Policia e Kosovës po kryen një operacion në gjithë Kosovën, në bazë të vendimit të lëshuar nga Gjykata e Prishtinës për arrestim, në lidhje me hetimin për korrupsion

“KFOR-i konfirmon se kemi të bëjmë vetëm me një operacion policor dhe se Forcat e Sigurisë së Kosovës ose cila do forcë tjetër ushtarake nuk është vendosur në veri të Kosovës,” thekson komunikata zyrtare e KFOR-it si përgjigje për Agjencinë shtetërore serbe të lajmeve Tanjug duke përsëritur:

“KFOR-i vazhdon të mbikëqyrë situatën dhe se është i gatshëm të ndërhyjë, nëse kërkohet , si e treta në linjën e përgjegjësisë, në mënyrë që të garantoj sigurinë për të gjitha bashkësitë në përputhje me mandatin që ka duke u bazuar në Rezolutën 1244 të KS OKB.”   

Para deklaratës së gjeneralit është shprehur edhe zëdhënësi i KFOR-it, Vinçenco Graso duke theksuar se operacioni policor po realizohet me urdhër të Prokurorisë  në gjithë territorin e Kosovës dhe nuk është kundër serbëve, por kundër personave të akuzuar për krim dhe korrupsion .

“Ne për momentin je duke vëzhguar situatën, jemi në kontakt me autoritetet në Prishtinë, por i kemi të hapura komunikimet edhe me Serbinë,” theksoi Graso ndërsa dha përgjigje edhe në kërkesën e autoriteteve serbe se KFOR-i duhet të bëjë diçka me rastin e aksionit të Njësisë Speciale të Kosovës.

“Lidhur me këtë çështje kemi diskutuar edhe më parë, nuk përzihemi në aksionet e policisë derisa nuk na kërkohet të ndërhyjmë,” sqaroi Graso.