Zgjedhjet PE/ Fidesz, Orban: Mund ti bashkohemi një grupi të ri!

Partia Fidesz e Kryeministrit të Hungarisë, Viktor Orban mund ti bashkohet një grupi të ri parlamentar në Parlamentin Evropian nëse qëndrimi në grupin Partia Popullore Evropiane, EPP, të qendrës së djathtë nuk përputhet me interesat kombëtare, tha sot Orban pas fitores së partisë së tij me 52 për qind në zgjedhjet për PE.

EPP në muajin mars ka pezulluar Fidesz për shkak të, siç u tha, mosrespektimit të sundimit të ligjit, lirisë së mediave si dhe të drejtat e pakicave.

“Ne tani jemi anëtare e EPP por do të shohim se në çfarë drejtimi do të shkoj Partia Popullore Evropiane. A mund të ndikojmë dhe a është në përputhje me interesat Hungarisë dhe popullit hungarez,” tha Orban duke shtuar:

“Nëse po, do të mbetemi, nëse jo, do të jemi pjesë e një grupi të ri parlamentar,” ishte i prerë Viktor Orban pa dhënë sqarime se cili është ky grup i Parlamentit Evropian që mund ti bashkohet Fidesz.

Përafrimi i Orbanit me liderët e të djathtës ekstreme nga fundi i fushatës zgjedhore për Parlamentin Evropian ka acaruar aleatët e tij në EPP ndërsa për Presidentin e ri të KE ai sot u shprehë qartë se do ta mbështesë kandidatin i cili ka qëndrim kundër emigrantëve, ka ndjenja kombëtare dhe është i gatshëm të mbroj kulturën e krishterë. “Në mendje e kemi një kandidat të tillë, dhe jo vetëm një,” tha lideri hungarez i Fidesz, Viktor Orban duke refuzuar të jap emra.