Paqe në Podgoricë, Dardanëve u mungoi goli i fitores

Mali i Zi dhe Kosova kanë ndarë pikët, duke luajtur baras 1:1, mbrëmjen e sotme në Podgoricë, sfidë kjo e zhvilluar në kuadër të kualifikueseve për Evropianin 2020, raporton RTK.

Përballja mes malazezëve dhe Dardanëve është zhvilluar pa pranin e shikuesve pasi që skuadra malazeze ishte e dënuar nga UEFA.

Futbollistët e Përfaqësueses së Kosovës, ishin ekip më i mirë sipas statistikave por jo edhe sipas rezultatit për të marrë trepikëshin e rëndësishëm nga ky udhëtim.

Djemtë e Kosovës e dominuan lojën në pjesën e parë, duke u shfaqur ekip më rrezikshëm, ndërsa goli i epërsisë erdhi në minutën e 23-të përmes Milot Rashicës, rezultat më të cilin skuadrat shkuan në pushi.

Duhet theksuar se Kosova nga minuta e 34-të luajti pa yllin Arbër Zeneli, i cili për shkak të një lëndimi u detyruar ta lëshojë fushën.

Edhe në fraksionin e dytë, ishte Kosova skuadër që kontrolloi lojën në terren, por ndëshkimi erdhi në minutën e 69-të përmes Mugosa, i cili barazoi shifrat në 1:1.

Deri në fund të ndeshjes, futbollistët e Kosovës, bën presion të madh drejt portës kundërshtare, por pa mundur të gjejnë rrugën e golit të fitores.

Përfundimisht Mali i Zi dhe Kosova ndajnë pikët, dhe për skuadrën tonë ky është barazimi i dytë në këto kualifikuese.