Moska ende e pavendosur për takimin Trump-Putin

Moska tha se ende nuk është vendosur nëse presidenti i Rusisë, Vladimir Putin do të takohet me presidentin e SHBA-së, Donald Trump në samitin G20, që do të mbahet në Japoni, gjatë këtij muaji.

Këshilltari i presidentit rus, Yuri Ushakov, u tha gazetarëve se Moska është e hapur dhe shpreson se takimi do të ndodhë, mirëpo shtoi se një ide e tillë ende qëndron “pezull”.

Ndryshe, Presidenti Trump është shprehur se planifikon të takon Putinin gjatë samitit të 20 vendeve më të zhvilluara të botës.

Të dyja vendet kanë mosmarrëveshje dhe tensione sa i përket Sirisë, përfshirjes ruse në Ukrainë dhe ndërhyrjes në zgjedhjet e SHBA-së, gjë të cilën Moska e mohon.