Kot e ka Kocijançiç, Macron: Do të refuzoj çdo lloj zgjerimi të BE

Federica Mogherini, Johannes Hahn, Knut Fleckenstein dhe Maja Kocijançiç mund të mos flejnë fare gjumë duke e lavdëruar Edi Ramën dhe “zgjedhjet e tij të lira dhe demokratike”, por Presidenti i Francës, Emmanuel Macron, e bëri të qartë se do të bllokojë çdo përpjekje për zgjerimin e Bashkimit Evropian, derisa ky i fundit të kalojë nëpër reforma të thella.

Deklarata vjen pavarësisht paralajmërimeve se shtyrja e bisedimeve të anëtarësimit me Shqipërinë dhe Maqedoninë e Veriut mund të minojë stabilitetin në rajonin e Ballkanit, raporton RFE.

“Do të refuzoj çdo lloj të zgjerimit përpara një reforme të thellë të funksionimit tonë institucional”, tha Macron pasi udhëheqësit e BE-së dështuan të plotësojnë pozitat e larta në bllok për pesë vjetët e ardhshëm.

Ndryshe, Komisioni Evropian ka rekomanduar që Shqipëria dhe Maqedonia e Veriut të hapin negociatat e anëtarësimit me BE-në por Këshilli i ministrave BE-së, muajin e kaluar, e ka shtyrë marrjen e vendimit të tillë për në tetor.

Ndërkohë shefja e politikës së jashtme të BE-së, Federica Mogherini, ka paralajmëruar në muajin maj se çdo dështim për të nisur negociatat së shpejti mund të minojë stabilitetin dhe të shkurajojë seriozisht reformat e mëtejshme. Dhe së fundi, Zëdhënësja e KE, Maja Kocijançiç zgjedhjet më jodemokratike në glob i quajti të të qeta dhe të rregullta.