“Eliot Engel” bashkon shqiptarët, Rruga Gjakovë-Tropojë merr emrin e tij
Rruga nacionale Gjakovë-Tropojë mori emrin e kongresmenit amerikan, mikut të shtrenjtë të shqiptarëve, dhe Kryetarit aktual të Komisionit për Punë të Jashtme pranë Kongresit amerikan, Eliot Engel.
Në Qafë Morinë, kufirin mes Gjakovës e Tropojës, me pjesëmarrjen e Eliot Engel, Presidentit shqiptar Ilir Meta dhe Kryetarit të Gjakovës, Ardian Gjini e atij të Tropojës, Besnik Dushaj, u mbajt ceremonia e veçantë e emërtimit të kësaj rruge.
Kryetari i Tropojës, Besnik Dushaj, tha se vendimi ishte marrë bashkërisht nga bashkia që drejton dhe Komuna e Gjakovës për të nderuar kontributin e kongresmenit që shqiptarët në të dyja anët e kufirit të jenë të lirë dhe më të bashkuar.
Dushaj më pas nderoi kongresmenin Engel me titullin “Qytetar nderi” i Tropojës për kontributin historik në forcimin dhe konsolidimin e miqësisë shqiptaro-amerikane dhe çështjes shqiptare.
Ndërsa Kryetari i Gjakovës, Ardian Gjini, tha se kjo rrugë tashmë merr peshë tjetër pas emërtimit me emrin e Eliot Engel. Ai tha se Gjakova dhe Tropoja do ta mbajnë me nder dhe krenari këtë emër.
Kryetari i Komunës tha se për shkak të kontributit të kongresmenit dhe SHBA-së gjaku i djemve dhe vajzave që kanë rënë për liri nuk ka shkuar kot dhe se shqiptarët nuk do ta harrojnë asnjëherë emrin e Eliot Engel.
Presidenti shqiptar, Ilir Meta, i pranishëm në këtë ceremoni tha se emri i Eliot Engel është i gdhendur në zemrat e të gjithë shqiptarëve kudo ku ata ndodhen.
Presidenti i Republikës tha se ka një lidhje të fortë mes Engel dhe shqiptarëve dhe kjo vihet re edhe në zyrën e tij ku është e vendosur deklarata e pavarësisë.
Shumë i lumtur dhe i nderuar është shprehur kongresmeni Eliot Engel. Ai tha se respekti që të bëjnë shqiptarët nuk e bën asnjë popull tjetër në botë.
Kongresmeni amerikan deklaroi se është vërtet kënaqësi të shohësh kur emërohet diçka sipas emrit tënd kur ti je ende gjallë.
Kryetari i Komisionit për Punë të Jashtme pranë Kongresit amerikan tha se miqësia mes popullit të tij dhe shqiptarëve do të jetë e përjetshme dhe se SHBA, Shqipëria e Kosova si aleatë qëndrojnë përkrahë lirisë e demokracisë.
