Dialogu Kosovë-Serbi/ Takimi me Engel, Haradinaj kërkon mbështetjen e SHBA
Kryeministri i Kosovës, Ramush Haradinaj në takim me Kryetarin e Komisionit për Punë të Jashtme pranë Kongresit amerikan, Eliot Engel diskutuan për zhvillimet politike në vend dhe për procesin e dialogut ndërmjet Kosovës dhe Serbisë, ku Haradinaj i kërkoj mikut të madh të shqiptarëve, mbështetjen e SHBA për procesin e dialogut.
“Kosova është e përcaktuar për të ardhmen euro-atlantike, në miqësi të përhershme me SHBA-në, fqinjësi të mirë me vendet e rajonit dhe përmbylljen e dialogut me Serbinë, me një marrëveshje finale, ligjërisht të obligueshme që çon në njohje reciproke në kufijtë ekzistues”, tha Haradinaj, duke kërkuar nga kongresmeni amerikan, mbështetjen e SHBA-së për procesin e dialogut.
Haradinaj tha se Kosova do të jetë përjetë mirënjohëse për përkrahjen që Shtetet e Bashkuara kanë dhënë para dhe gjatë luftës dhe tani në shtetetndërtimin dhe konsolidimin e institucioneve demokratike të Kosovës, ndërsa Eliot Engel tha se shpreson që Kosova të vazhdojë të përparojë në drejtim të prosperitetit, demokracisë dhe sundimit të ligjit.
