Zgjedhjet në Greqi/ Mitsotakis: Të bashkuar le ta shkruajmë historinë tonë!

Pas fitores në zgjedhjet parlamentare, Kryetari i “Demokracia e re”, Kyriakos Mitsotakis duke folur për herë të parë si Kryeministri i ri i Greqisë, tha se të bashkuar le ta shkruajmë historinë tonë.

Duke falenderuar të gjithë mbështetësit dhe të gjithë ata që i besuan atij dhe forcës politike që ai drejton, Mitsotakis, premtoi se do të jetë kryeministri i të gjithë grekëve, raporton BW.

“Nesër do të jetë një ditë e re për të gjithë Greqinë. Të bashkuar le të shkruajmë historinë tonë. Dua të falenderoj të gjitha ata që besuan tek ne dhe premtoj se unë do të jem kryeministrit i të gjithë grekëve,” tha ndër të tjera Mitsorakis.

Ndryshe, kryeministri i ri vjen nga një dinasti e vjetër politike në Greqi. Ai është djali i Ish-kryeministrit Konstantinos Mitsotakis. Motra e tij, Dora Bakoyannis ka qenë kryebashkiake e Athinës dhe më vonë u bë ministre e Jashtme. Kyriakos Mitsotakis është shkolluar në Stanford dhe Harvard në SHBA.

Të drejtën e votës në Greqi, raporton BW, e kanë 10 milionë banorë, ndërkohë që në këtë vend jetojnë vetëm 11 milionë njerëz dhe janë, më shumë se tre milionë grekë jetojnë jashtë vendit, kryesisht në SHBA.

Tsipras: Respektoj vendimin e popullit

Pas mbylljes së procesit zgjedhor dhe pas daljes së exit-polleve të para ku partia e tij renditej e dyta, Kryeministri në detyrë i Greqisë, Alexis Tsipras bëri me dije se kishte telefonuar fituesin e këtyre zgjedhjeve, kryetarin e “Demokracisë së Re” Kyriakos Mitsotakis dhe e kishte uruar për fitoren.

Tsipras tha se nesër do të kryejë të gjitha veprimet për ti dorëzuar detyrën Kryeministrit te ri.

“Pak më parë telefonova kolegun Micotaqis të cilit i urova fitoren në zgjedhje. Nesër do kryej të gjitha veprimet për të dorëzuar detyrën tek kryeministri i ri Micotaqis që të fillojë menjëherë punën. I kërkoj Demokracisë së Re të mos e marrë pushtetin me revansh por të jetë në interesat më të mira të grekëve,” tha Tsipras.

.