Haradinaj drejtë Hagës

Kryeministri në dorëheqje i Kosovës, Ramush Haradinaj është nisur sot drejtë Hagës ku pritet të paraqitet për intervistim para Gjykatës Speciale për krime lufte në Kosovë.

Para nisjes, Ramush Haradinaj, përmes rrjetit social Facebook ka bërë të ditur se po i përgjigjet ftesës për intervistim nga Dhomat e Posaçme në Hagë.

“Sot, si Ramush Haradinaj, qytetar i Republikës së Kosovës, i përgjigjem ftesës për intervistim nga Dhomat e Posaçme në Hagë. Tërësisht në të drejtën e Kosovës, i palëkundur për vendimet e mia jetësore dhe i patrazuar e ballëlartë,” tha Ramush Haradinaj duke shtuar se me nder ka mbrojtur të drejtën tonë, dje, sot dhe do ta mbrojë gjithmonë!

Ndryshe, Ramush Haradinaj dha dorëheqje nga posti i Kryeministrit të Kosovës, më 19 korrik, për shkak të ftesës për intervistim në cilësinë e të dyshuarit pranë Gjykatës Speciale për krime lufte në Kosovë.

Gjykata Speciale, e cila është formuar sipas ligjeve të Kosovës, ka selinë në Hagë. Kjo gjykatë ka kompetencë mbi veprat penale të kryera në Kosovë nga 1 janari i vitit 1998 deri më 31 dhjetor 2000.

Kjo Gjykatë do të hetoj krimet e kryera kundër njerëzimit, krimeve të luftës dhe krimeve të tjera që lidhen me pretendimet e raportit të senatorit zviceran Dick Marty, që është miratuar nga Këshilli i Evropës në vitin 2011.