Javën e parë të qeverisjes, Basha në Kukës: Trau i Rrugës së Kombit hiqet!

Pasi shumica “Rama ik” të kthehet në shumicë për ndryshim, Kryetari i Partisë Demokratike, Lulzim Basha, pas takimit me strukturat e PD u zotua nga Kukësi se trau i Rrugës së Kombit do të hiqet në javën e parë të qeverisë së PD.

“Dua t’u shpreh të gjithë kuksianëve mirënjohjen time të jashtëzakonshme në emër të Partisë Demokratike, në emër të opozitës, për refuzimin masiv që i bënë regjimit të Edi Ramës më 30 qershor. Kukësi, natyrisht, i ka prirë betejës për liri, për demokraci dhe për mundësi të barabarta në ligj për çdo qytetar, me revoltën kundër taksës së rrugës,” tha Lulzim Basha duke bërë të ditur se atë që u kishte kërkuar strukturave të Partisë Demokratike Dega Kukës”

“Dua të rikonfirmoj vendosmërinë tonë për të hequr traun e Rrugës së Kombit në javën tonë të parë në pushtet. Sikundër u kam kërkuar të gjitha strukturave të Partisë Demokratike të bëhen gati që, së bashku me qytetarët e Kukësit, me gjithë qytetarët shqiptarë ta kthejmë shumicën “Rama ik” të 30 qershorit, në shumicën e një ndryshimi të thellë ekonomik dhe politik për çdo shqiptar, për t’i dhënë fund emigracionit dhe kurbetit që po e tret Kukësin, për t’i kthyer pasuritë e shqiptarëve.”

Rrugët, bregdetin, minierat, pyjet, të gjitha pasuritë e këtij vendi të bekuar nga Zoti, tha Kryetari i PD, Lulzim Basha se do të rikthehen në funksion të mirëqenies dhe punësimit të shqiptarëve ndërsa përfundoi:

“Punësimi i shqiptarëve, mirëqenia e shqiptarëve, punësimi i kuksianëve, mirëqenia e kukësianëve janë objektivi dhe prioriteti më madhor i Partisë Demokratike dhe i imi personalisht. Faleminderit!”