Denarbibat i pret burgu, Basha në Përmet: S’ka Bablok t’i shpëtojë!

Kryetari i Partisë Demokratike, Lulzim Basha, premtoi nga Përmeti se Denarbibat që i shërbyen Ramës për të dhunuar Kushtetutën më 30 Qershor i pret burgu dhe nuk ka bandit e Bablok t’i shpëtojë.

Duke e konsideruar nul farsën e 30 Qershorit, Lulzim Basha para strukturave të PD në Përmet e cilësoi atë një masakër të Kushtetutës, të ligjit dhe të standardeve.

“Farsa e 30 Qershorit është një grusht kriminal institucional i Edi Ramës për të pushtuar pushtetin vendor, për të shkatërruar KQZ-në dhe gjithë sistemin e administrimit të zgjedhjeve, përfshi Kolegjin Zgjedhor.”

Lideri i opozitës shprehu edhe në Përmet vendosmërinë për të nxjerrë para përgjegjësisë këdo që ka dhunuar Kushtetutën dhe ligjin në 30 Qershor.

“Të gjithë ata që u bënë pjesë e këtij grushti kriminal institucional, me në krye ikonat e hajdutërisë dhe paligjshmërisë si Denarbibat që i shërbyen Edi Ramës për të dhunuar Kushtetutën dhe ligjin me 30 qershor, do të përgjigjen para drejtësisë për veprimet e tyre kriminale. Burgu i pret dhe nuk ka bandit e Bablok t’i shpëtojë,” tha Kryetari i Partisë Demokratike, Lulzim Basha, duke përfunduar:

“Detyra kryesore e Partisë Demokratike është t’i përgjigjet mesazhit të 30 Qershorit, refuzimit të Edi Ramës nga 85 përqind e shqiptarëve dhe thirrjes së tyre për ndryshim.”