Magjia e Mrizit të Zanave, që të gjithë po e kopjojnë

Ndryshimi në fshatin Fishtë të Lezhës mund të ndodhte vetëm me prekjen magjike të zanave. Në fakt, puna e palodhur e dy vëllezërve Prenga dekadën e fundit, ka ndryshuar filozofinë e një zone të tërë.

Shef Altin Prenga thotë se këtë model e pa fillimisht në Itali, ku numërohen mbi 50 mijë njësi agroturizmi. Në çdo pikë që ai ka vizituar atje, kuzhina dhe dialekti ndryshon sipas zonave. Sa herë vinin në Shqipëri, ndienin që në restorante mungonte lidhja e traditës dhe identitetit. Për këtë arsye vendosi që të hapte një restorant ku do të sillte gatime tradicionale.

Një vend që sofra të shtrohej si dikur, – shpjegon Prenga, duke shtuar se duhet të ecim me hapat e kohës, por duke mbajtur lidhjet me rrënjët. Puna në agroturizëm, siç e thekson Prenga, është një betejë e përditshme.

Megjithatë për Altin Prengën ky ka qenë një vit i jashtëzakonshëm për agroturizëm Mrizin e Zanave, i pajisur së fundmi edhe me certifikatë nga Ministria. Në një ditë të zakonshme pune mund të numërohen turistë nga rreth 10 etni, që marrin shërbim dhe shijojnë përvojën në Mrizin e Zanave.

Turistët që kanë qenë në Mrizin e Zanave mbeten shumë të kënaqur. Sipas Prengës, kjo ndodh pasi ata kanë pak pritshmëri për Shqipërinë.
Që prej vitit të kaluar, ata kanë vënë në dispozicion shtretër për turistët që duan të kalojnë natën në bujtinë. Pak javë më parë, “Kulla e Arnume” bëri xhiron e botës, duke u shfaqur në faqet më të njohura të arkitekturës në botë. Për projektin e “Kullës së Arnume” bashkëpunoi me disa arkitektë të rinj, të cilët sollën në variantin modern kullat tipike të zonës së Veriut.

Mrizi i Zanave ka qenë një gjenerator punësimi për të gjithë zonën, në mënyrë direkte dhe indirekte. Thuajse i gjithë stafi i tij është marrë nga zona dhe janë kryesisht të rinj. Atyre që janë në kontakt të drejtpërdrejtë me klientët, Prenga ju ka dhënë porosi të mos e ndryshojnë dialektin dhe të jenë vetvetja. Agroturizmi ka qenë burim punësimi edhe për të gjithë fshatin, ku numërohen rreth 400 banorë. Në mënyrë indirekte, fermerët janë nxitur që të prodhojnë më shumë. Sukseset janë të shumta, por edhe problemet nuk kanë qenë të pakta. Zona e Zadrimës e cila njihet për rritjen e shpendëve, vuan prej kohësh mungesën e një thertoreje.

Duke marrë certifikatën si agroturizëm, Mrizi i Zanave mund të përfitojë nga të gjitha lehtësitë fiskale. Ky ka qenë një avantazh për punën e Mrizit këtë vit, por Prenga nuk lë pa përmendur edhe promovimin që i është bëra nga qeveria të gjitha pikave agroturistike në vend. Puna e tyre tashmë nuk kufizohet vetëm gjatë fundjavave, por ka frekuentim në të gjithë ditët e javës./Monitor/