Protesta e PD, policia procedon penalisht 20 protestues

Policia e Shtetit ka nisur procedim penal në gjendje të lirë për 20 protestues, të cilët morën pjesë dje në protestën e opozitës.

Nga analizimi i pamjeve filmike ka rezultuar se një grup prej 20 personash kanë krijuar tension dhe kanë goditur efektivët e policisë me rrjetë hekuri, gurë dhe shkopinj tek Ministria e Brendshme dhe përballë Kryeministrisë.

Sipas policisë, ata janë proceduar për kundërshtim të punonjësve të policisë, shkelje të lejes për protestë si dhe goditje për shkak të detyrës.

Nga incidentet e djeshme në protestën e opozitë mbetën të lënduar 11 efektiv policie dhe tre qytetarë që pas ndihmës mjeksore janë jashtë rrezikut për jetën.