Vazhdon barriera tregtare ndaj Kosovës. Maqedoni e Veriut, Bekteshi: Plotësoni standardet!

“Pres që Kosova për një afat të shkurtër kohor të sigurojë dokumentet e nevojshme për të hequr barrierat.” Kështu u shpreh ministri i Ekonomisë i Maqedonisë së Veriut, Kreshnik Bekteshi, duke përsëritur se janë të përkushtuar në përmirësimin e kushteve të punës të kompanive dhe hapjen e tregjeve të reja, ndonëse premtimi i dhënë për ditën e premte nga dy ministrat përkatës, ngeli premtim në letër.

Edhe pse tregtarët kosovarë si dhe ata maqedonë nuk presin premtime por heqje të marrierave tregtare, Kreshnik Bekteshi, sërisht i kthehet vetëm fjalëve ndërsa barrierat tregtare vazhdojnë të jenë në fuqi:

“Në rast se autoritetet e Republikës së Kosovës japin të gjitha garancitë e nevojshme dhe grupet e punës konfirmojnë se janë vendosur programet për mbikëqyrje aktive dhe pasive të akuakulturës dhe se janë zbatuar siç duhet, Agjencia e Ushqimit dhe Veterinarisë në Maqedoninë e Veriut mund të lejojë eksportin e produkteve të akuakulturës në Republikën e Maqedonisë së Veriut”.

Dhe jo vetëm kaq!

Ministri Bekteshi ka publikuar edhe letrën dërguar Ministrisë së Tregtisë dhe Industrisë të Kosovës.

“Bazuar në këtë marrëveshje, ne presim që gjatë këtyre ditëve të punës të tërhiqet vendimi për ndalimin e eksportit të patateve dhe mjaltit nga Republika e Maqedonisë së Veriut në Republikën e Kosovës!”