Agjenda e NATO-s në samitin e korrikut…

NATO saktësoi sot  se në Samitin që do të mbajë në korrik do të përqendrohet në pesë fusha kyçe, nga modernizimi deri te marrëdhëniet me Bashkimin Evropian .

NATO vuri theksin edhe mbi “menaxhimin” e marrëdhënieve me, siç tha, një Rusi gjithnjë e më kategorike.

Sekretari i përgjithshëm i Aleancës, Jens Stoltenberg, tha para Asamblesë Parlamentare të NATO-s në Varshavë se samiti do të përqendrohet edhe në “projektimin e stabilitetit në rajonet kufitare, sidomos në jug, si dhe në ndarjen e shpenzimeve”.

Duke u bazuar në vendimin e Aleancës për vendosjen e grupeve luftarake në krahun e saj lindor, që kufizohet me Rusinë, Stoltenberg tha se pret që në samitin e 11 dhe 12 korrikut në Bruksel, udhëheqësit e shteteve “të marrin vendime edhe mbi përforcimin e gatishmërsë ushtarake”.

“Mbrojtja jonë nuk varet vetëm nga forcat që i kemi vendosur, por edhe nga aftësia jonë për t’i lëvizur ato forca shpejt nëse është e nevojshme”, tha Stoltenberg.

Vendet anëtare të NATO-s kanë vendosur rreth 4.000 trupa në shtetet e Baltikut dhe në Poloni, për t’iu kundërvënë kërcënimit rus, sidomos pas aneksimit të gadishullit ukrainas të Krimesë nga Moska, në vitin 2014.